कालिकोटमा सैनिकहरूको ‘नृश्रंश’ हत्या गरिएको दावी
शाही नेपाली सेनाले आइतवार कालिकोट जिल्लामा भएको भिडन्तमा माओवादीहरूले कब्जामा लिएका सुरक्षाकर्मीहरूलाई यातना दिइ हत्या गरेको आरोप दोहो-याएको छ।
बीबीसी नेपाली । काठमाण्डौंस्थित शाही नेपाली सेनाको मुख्यालयमा शुक्रवार आयोजित पत्रकार सम्मेलनलाई सम्बोधन गर्दै शाही नेपाली सेनाका प्रवक्ताले त्यस्तो आरोप दोहो-याएका हुन्।
सहायक रथी दिपक गरूङले माओवादी विद्रोहीहरूले कालिकोटको भिडन्तपछि नियन्त्रणमा लिइसकेका सैनिकहरूमाथि अमानवीय व्यवहार गरेको आरोप लगाउनुभयो।
उहाँले भन्नुभयो, “आतंककारीहरूले कब्जामा लिएका केही निशस्त्र जवानहरूको हात बाँधेर आगो लगाई, शरीरका सम्वेदनशिल अंग काटेर तिनका टाउकामा गोली हानी हत्या गरेका थिए।”
कालिकोटको पिलीस्थित कर्णाली राजमार्गको निर्माणमा खटिएको सेनाको अस्थायी आधार शिविरमा गत आइतवार ठुलो संख्यामा आएका माओवादी विद्रोहीहरूले हमला गर्दा कम्तिमा ४३ जना सुरक्षाकर्मीहरूको मृत्युभएको र ७५ जना सम्पर्क भन्दा बाहिर रहेको सेनाले जनाएको छ।
सेनाले माओवादीहरू तर्फ ३०० जना सम्म मारिएका हुनसक्ने दावी गरेको छा। तर सैनिक प्रवक्ताले घटनास्थलमा छ-सात जना विद्रोहीहरूको लास मात्र फेला परेको बताउनुभयो।
माओवादीहरूको हमलाका बावजुद त्यस क्षेत्रमा सेनाको उपस्थिति कायमै रहने र सुरक्षा फौजले केहि दिनभित्रै सुर्खेत-जुम्ला सडकको निर्माण कार्यलाई निरन्तरता दिने पनि बताउनुभयो।
यसअघि कालिकोटको भिडन्तमा नियन्त्रणमा लिइएका सुरक्षाकर्मीहरूलाई लहरै राखी हत्या गरिएको भन्ने आरोपको माओवादी पक्षले खण्डन गरिसकेको छ।
माओवादीका अध्यक्ष प्रचण्डले यसैसाता एक विज्ञप्ती जारी गर्दै सेनाको आरोप आधारहिन भएको बताउनु भएको थियो।
राष्ट्रसंघिय अधिकारीको अपिल
यसैबीच नेपालस्थित राष्ट्रसंघिय मानव अधिकार उच्चायोगको कार्यालयका प्रमुख इयन मार्टिनले माओवादीहरूको कब्जामा रहेका भनिएका सुरक्षाकर्मीहरूको जीवन रक्षा गर्न विद्रोहीहरू समक्ष पुन: अपिल गर्नुभएको छ।
शुक्रवार राजधानीमा आयोजित एक अन्तरकृया कार्यक्रममा बोल्दै श्री मार्टिनले माओवादी नेतृत्वले सार्वजनिक वक्तव्य मात्र नभै आफूसितको प्रत्यक्ष सम्पर्कमा पनि आफ्नो नियन्त्रणमा रहेका सुरक्षाकर्मीहरूलाई सुरक्षित राखिने आश्वासन दिएको बताउनुभयो।
उहाँले आफ्नो कार्यालयलाई कुनै राजनीतिक म्याण्डेट नदिइएको तर विद्रोहीहरू मानव अधिकारको पालन गर्न सचेत होउन भनी उनिहरूसित पनि सम्पर्कमा रहेर काम गर्ने गरेको स्पष्ट पार्नुभयो।
तर उहाँले त्यस्तो सम्पर्कबारे थप विवरण दिनुभएन।
Popularity: 13%
1 comment August 13th, 2005
