Archive for February 27th, 2007

बस त्रिशुलीमा खस्दा १५ को मृत्यु ३१ घाइते

एचकेनेपाल डट कम काठमाडौं सम्वाददाता-
गए राति पृथ्वी राजमार्गको कुरिनटार नजिक ना३ख २१४१ नम्बरको यात्रु बस त्रिशुली नदीमा खस्दा कम्तीमा १५ जनाको मृत्यु भएको छ भने ३१ जना घाइते भएका छन्।

मृत्यु हुनेमा अधिकांश भारतीय नागरिक भएको बताइन्छ। दुर्घटनामा बसधनी वीरगन्जका जोगेन्द्र जैसवाल, बस चालक मानसिंह राई र बिहारका राजेन्द्रप्रसाद यादवको मृत्यु भएको छ भने अन्यको सनाखत हुन सकेको छैन। १३ जना यात्रुको घटनास्थलमै मृत्यु भयो भने दुई जनाको उपचारका क्रममा मृत्यु भएको थियो ।

बस काठमाडौबाट वीरगञ्जतर्फ जाँदै गर्दा करिव १५० मीटर तल त्रिशुलीमा खसेको थियो। घाइतेहरुको उपचार बीर अस्पताल र भरतपुर अस्पतालमा भैरहेको बताइन्छ। घाइतेहरूमध्ये १४ जनाको स्थिती गम्भीर रहेको बताइन्छ।

दुर्घटनाको कारण थाहा हुन नसके पनि बसमा ५० जनाभन्दा बढी यात्रु सवार रहेको प्रहरीले बताएको छ।

Popularity: 12%

Add comment February 27th, 2007

राजालाई कारबाही गर्ने सरकारको निर्णय

एचकेनेपाल डट कम काठमाडौँ प्रतिनिधि-
मन्त्रिपरिषद्को बैठकले राजालाई कारबाही गर्ने निर्णय गरेको छ। प्रजातन्त्र दिवसका दिन राजाबाट आएको सन्देश असंवैधानिक, अनधिकृत भएको भन्दै सरकारले अन्तरिम विधायिकाको निर्देशन बमोजिम कारबाही गर्ने भएको हो।

यसका लागि राजनीतिक सहमति गरिने भएको छ। कस्तो कारबाही गर्ने भन्ने विषयमा आठ दलको बैठक बस्ने भएको छ।

यसैगरी सरकारले राजा र राजपरिवारको सम्पति राष्ट्रियकरण गरी जनहीतका लागि ट्रस्ट बनाउन मन्त्री गोपालमान श्रेष्टको संयोजकत्वमा एउटा समिति पनि बनाएको छ।

Popularity: 12%

6 comments February 27th, 2007

राष्ट्रिय चिह्न पनि परिवर्तन गर्नपर्ने माग

एचकेनेपाल डट कम काठमाडौँ प्रतिनिधि-
जनजाति महासङ्घका अध्यक्ष पासाङ शेर्पाले अन्तरिम संविधान संशोधन गरिँदा जातीय आधारमा समानुपातिक निर्वाचन, सङ्घात्मक राज्यप्रणाली, भाषिक स्वतन्त्रता र राष्ट्रिय चिह्नहरूको परिवर्तनमा ध्यान दिनुपर्ने बताउनुभएको छ।

राजधानीमा आयोजित एक साक्षात्कार कार्यक्रममा गृहमन्त्रीको राजिनामाको प्रतिष्ठा नबनाई वार्तामा बस्न विभिन्न राजनीतिक दलका नेताहरूले मधेसी जनअधिकार फोरमलाई आग्रह पनि गरेका छन् ।

मुलुकको एकमात्र लक्ष जेठ महिनाभित्र संविधानसभाको निर्वाचन समयमै सम्पन्न गर्नु भएकाले निर्वाचनलाई पर धकेल्ने गरी आन्दोलनका थप कार्यक्रम सञ्चालन नगर्न र वार्तामा बस्न उहाँहरूले फोरमसँग आग्रह गर्नुभयो ।

मधेसी जनअधिकार फोरमका तर्फबाट वार्ताटोलीका संयोजक सीतानन्दन रायले गृहमन्त्रीको राजिनामा र तर्राई आन्दोलनसम्बन्धमा उच्चस्तरीय छानबिन आयोगको गठन नभएसम्म वार्तामा नबस्ने स्पष्ट गर्नुभयो ।

Popularity: 12%

3 comments February 27th, 2007

सरकार-जनजाति वार्ता अब १८ गते

एचकेनेपाल डट कम काठमाडौँ प्रतिनिधि-
सरकार तथा आदिवासी जनजाति महासङ्घका प्रतिनिधिहरूबीच भएको वार्ता कुनै खास सहमतिमा नपुगी यही फागुन १८ गते बिहान बस्ने गरी टुङ्गिएको छ भने भोलिको नेपाल बन्द पनि हुने भएको छ।

महासङ्घका तर्फबाट बैठकमा आफ्ना माग प्रस्तुत गरी आगामी जेठ महिनाभित्र संविधानसभाको निर्वाचन सम्पन्न गर्नुपर्ने पक्षमा आफूहरू रहेको बताइयो ।

बैठकमा कृषि तथा सहकारीमन्त्री महन्थ ठाकुरको संयोजकत्वमा गठित सरकारी वार्ता टोलीका तर्फबाट स्थानीय विकासमन्त्री राजेन्द्रप्रसाद पाण्डे र जलस्रोत राज्यमन्त्री ज्ञानेन्द्रबहादुर कार्की सहभागी हुनुहुन्थ्यो ।

यसैगरी महासङ्घका तर्फाट संयोजक डा.ओम गुरुङसहित सदस्यहरू डा.कृष्णबहादुर भट्टचन, मञ्जुल याक्थुम्बा, सोमा र्राई, डिकी लामा र कृपासुर शेर्पाको बैठकमा सहभागिता थियो ।

Popularity: 12%

Add comment February 27th, 2007

“जेठमा संविधानसभा संभव छैन, गणतन्त्र घोषणा गरौँ”

एचकेनेपाल डट कम काठमाडौँ प्रतिनिधि-
नेकपा माओवादीका अध्यक्ष प्रचण्डले आठ दलको एकताका साथ सबै जनताको सहयोगबाट लोकतान्त्रिक गणतन्त्र स्थापना गर्न सकिने बताउनुभएको छ ।

केन्द्रीय जनसभा आयोजक समितिको आयोजनामा दाङमा भएको आमसभालाई सम्बोधन गर्दै अध्यक्ष प्रचण्डले देशमा अहिले प्रतिगामी र अग्रगामी शक्तिबीच अन्तिम लडाइँ चलिरहेको बताउनुभयो ।

आगामी जेठ महिनामा संविधानसभाको निर्वाचन हुने स्थिति छैन भन्दै उहाँले अब व्यवस्थापिका संसद्बाट गणतन्त्रको घोषणा गर्नुपर्नेमा जोड दिनुभयो ।

उहाँले १२ बुँदे समझदारीदेखि हुँदै आएका समझदारीको सही रूपमा कार्यान्वयन हुन नसकेकामा सात दलको आलोचना पनि गर्नुभयो ।

राजपरिवारको सम्पत्ति राष्ट्रियकरण गर्ने निर्णय भए पनि सरकारले अहिलेसम्म एकपैसा पनि राष्ट्रियकरण नगरेकामा आपत्ति जनाउँदै अध्यक्ष प्रचण्डले साम्राज्यवादीको चङ्गुलमा नफस्न सबै जनतासँग आग्रह गर्नुभयो ।

Popularity: 12%

4 comments February 27th, 2007

आफ्नै बाउलाई चिरपटले चुट्ने छोरा

एचकेनेपाल डट कम काठमाडौँ प्रतिनिधि-
धादिङ जिल्लाको देउराली गाविस-९ चिउरीबोट बस्ने ७१ वर्षीय कृष्णबहादुर गिरी आफ्नै छोराको कुटाइबाट घाइते भएका छन् ।

उनलाई गएराति साढे एक बजे ४५ वर्षीय छोरा प्रद्युम्न गिरीले आफ्नै घरमा दाउराको चिरपटले कुटेको प्रहरीले जनाएको छ ।

उनलाई उपचारका लागि शिक्षण अस्पताल महाराजगन्जमा लगिएको र हाल अवस्था चिन्ताजनक रहेको छ ।

छोरा प्रद्युम्नलाई महानगरीय प्रहरी वृत्त महाराजगन्जमा राखी आवश्यक अनुसन्धान भइरहेको बताइएको छ ।

Popularity: 12%

7 comments February 27th, 2007

हामीले हतियार किन लुकाउने ?

एचकेनेपाल डट कम काठमाडौँ प्रतिनिधि-
नेकपा माओवादीका अध्यक्ष प्रचण्डले आफ्नो पार्टीले हतियार लुकाएको भन्ने आरोप गलत भएको बताउनुभएको छ ।

नेपाल पत्रकार महासङ्घ दाङ शाखाद्वारा आयोजित पत्रकार सम्मेलनमा उहाँले भन्नुभयो- “कतिपय हतियार हराएका र कतिपय जलेका कारण सेनाले भनेको भन्दा केही हतियार कम देखिएको हो । दुई-चारवटा हतियार लुकाउनुको कुनै तुक छैन ।”

अध्यक्ष प्रचण्डले मधेसी जन अधिकार फोरमका नाममा पूर्वी तर्राईमा भएको आन्दोलन संविधानसभा भाँड्न खोज्नेहरूको षड्यन्त्र भएको आरोप लगाउनुभयो।

Popularity: 12%

Add comment February 27th, 2007


नेपाली समयः -

पशन तमू @ Twitter

Hong Kong Weather

Subscribe to our videos!


Calendar

February 2007
M T W T F S S
« Jan   Mar »
 1234
567891011
12131415161718
19202122232425
262728  

Posts by Month

Posts by Category

More news....