सत्ताको तानातानमा लागेकाले नयाँ संविधान नबन्ने–यादव
एचकेनेपाल डट कम संवाददाता-
पुनर्गठित नेकपा (माओवादी)का केन्द्रीय संयोजक मातृका यादवले प्रमुख दलहरू सत्ताको तानातानमा लागेकाले नयाँ संविधान नबन्ने बताउनु भएको छ।
नयाँ संविधान बनाउन उथलपुथलकारी सङ्घर्षको आवश्यकता औंल्याउँदै एकीकृत नेकपा माओवादीको आन्दोलन पनि कुर्सीकै लागि सञ्चालन रहेको यादवले बताउनुभयो।
पुनःगठित माओवादीको कार्यकर्ता प्रशिक्षण कार्यक्रम उद्घाटन गर्न धुलाबारी आउनु भएका संयोजक यादवले सञ्चारकर्मीसँग उक्त बताउनु भएको हो।
पार्टीले तत्काल सशस्त्र आन्दोलन नगर्ने उल्लेख गर्दै उहाँले जनयुद्ध अवधिमा पहिल्यै नेकपा माओवादीले कब्जा गरेको जग्गा र सम्पत्ति फिर्ता नगरिने बताउनुभयो।
भारतबाट ल्याउँदै गरेको हतियार बरामद भएको चर्चा बारे प्रश्न गर्दा उहाँले भन्नुभयो–…त्यो निराधार आरोप हो। हल्ला त जे पनि गर्न सकिन्छ। हामीसँग हतियारधारी सङ्गठन हो भन्ने जबर्जस्त आरोप लगाउन त्यस्तो हल्ला चलाइएको हो।’
तराईका भूमिगत पृथ्वी, पवन लगायतका सशस्त्र समूहसँग कुराकानी भइरहेको र पूर्वी पहाडमा क्रियाशील कार्यकर्तासँग कार्यगत एकता भइरहेको उहाँले कुराकानीमा खुलासा गर्नुभएको छ।
एकीकृत नेकपा माओवादीले कम्यूनिष्टको विचार र नीति त्यागेर संशोधनवादी लाइन समातेका कारण आफूले पार्टीलाई क्रान्तिकारी धारमा सञ्चालन गर्न पुनःगठन गरेको उहाँले दाबी गर्नुभएको छ।
धुलाबारीको अतिथि सदनमा आइतबार उहाँले तीनदिने कार्यकर्ता प्रशिक्षण कार्यक्रमको उद्घाटन गर्नु भएको छ।
कार्यक्रममा झापा, मोरङ्ग र सुनसरी जिल्लाका डेढ सय अगुवा कार्यकर्ता सहभागी छन्।
पार्टीको जनसुरक्षा दस्ताको कडा सुरक्षाघेरामा आयोजित कार्यक्रममा सहभागीलाई खाने र बस्ने व्यवस्था भित्रै मिलाइएको छ।
Recent Videos:
Popularity: 16%
2 comments November 9th, 2009
