एचकेनेपाल डट कम संवाददाता-
काठमाडौ, ९ फागुन । सर्वोच्च अदालतले सूचना तथा सञ्चारमन्त्री जय प्रकाश गुप्तालाई डेढ वर्ष जेल सजाय, ८४ लाख ९ हजार ९ सय २८ रुपैयाँ ७ पैसाको जरिवानाको फैसला सुनाएको छ।
न्यायाधीशद्वय सुशीला कार्की र तर्कराज भट्टको इजलासले मंगलवार उक्त फैसला सुनाएको हो।
अख्तियार दुरुपयोग अनुसन्धान आयोगले मन्त्री गुप्तामाथि २ करोड ८ लाख ८ हजार गैरकानुनी रुपमा कमाएको भन्दै २०५९ चैत ६ गते विशेष अदालतमा मुद्दा दायर गरेको थियो।
यसअघि, विशेषका तत्कालीन अध्यक्ष भूपध्वज अधिकारीको इजलास समूहले गुप्ताको सम्पत्ति स्रोत खुलेको भन्दै उनलाई २०६४ जेठ २४ गते सफाइ दिएको थियो।
कांग्रेसबाट राजनीति सुरू गरेका गुप्ता पछिल्लो पटक मधेस राजनीतिमा सक्रिय थिए। उनी पटक पटक मन्त्री बनेका थिए।
अदालतको फैसलापछि आत्मसमर्पण गरेका गुप्तालाई जेल चलान गरिएको छ। जेल जानुअघि उनले आफू मधेस आन्दोलनमा लागेकै कारण दण्डित हुनु परेको बताए। प्रहरीको घेराउमा रहेका गुप्ताले सञ्चारकर्मीहरूमार्फत राजिनामा दिएको घोषणा गरेका थिए।
देवी जंग तमु / एचकेनेपाल डट कम -
पोखरा, ९ फाल्गुन । स्थानपति निमावि खिलाङ्गले आफ्नो स्वर्ण महोत्सवको अवसरमा देश तथा विदेशबाट करीब साढे २१ लाख रुपैयाँ आर्थिक संकलन गरी मंगलवार एक समारोहवीच महोत्सवको समापन गरेको छ।
२०१७ सालमा स्थापित कास्कीको पार्चे गा.विसमा रहेको विद्यालयमा माध्यमिक तहको कक्षा संचालन लगायतका लक्ष्यहरु राखी आइतवारदेखि आयोजित स्वर्ण महोत्सवको मंगलवार दिउंसोसम्म विद्यालयलाई २१ लाख ५४ हजार ६ सय १५ रुपैया आर्थिक सहयोग प्राप्त भएको हो। साथै देश तथा विदेशबाट सहयोग आउने क्रम जारी रहेको भन्दै करीब २५ लाख आर्थिक संकलन हुने महोत्सव संयोजक डिल वहादुर गुरुङले जानकारी दिनुभयो।
विद्यालयलाई खिलाङ्ग तमु समाज युकेबाट ७ लाख ४ हजार र युकेमा रहनुभएका प्रकाश गुरुङ ३० हजार, गुमन ध्वोज गुरुङ ५० हजार ५१, चन्द्र वहादुर गुरुङ ३० हजार, टेक वहादुर गुरुङ इलाज ५० हजार, हिम वहादुर गुरुङ ५० हजार, यम प्रसाद गुरुङ २५ हजार, देवीशोभा गुरुङ १० हजार ७, गम वहादुर गुरुङ २० हजार र यम वहादुर गुरुङ र उहाँकी श्रीमती रुपा गुरुङबाट २५ हजार रुपैया विद्यालयलाई प्राप्त भएको आर्थिक संयोजक शेर वहादुर गुरुङले जानकारी दिनुभयो। साथै विद्यालयलाई खिलाङ तमु समाज पोखरा, खिलाङ्ग गाउँ, पार्चे, चिप्ली, सिक्लेस, ताङतिङ, तप्राङ्ग लगायतका वरिपरीका गाउँबाट ७ लाख ४ हजार ४ सय ६७ रुपैया प्राप्त भएको छ।
त्यस्तैगरी, जापानमा रहनुभएका क्लवका भूपू अध्यक्ष झलक वहादुर गुरुङ्ग, कर्ण बहादुर गुरुङ र लोकमान गुरुङबाट प्रतिव्यक्ति २०/२० हजार र डिल सुब्बा गुरुङ क, डिल सुब्बा गुरुङ ख र तारा गुरुङबाट प्रतिव्यक्ति १०/१० हजार र बेलराज गुरुङबाट ५ हजार, हङकङकमा रहनुभएका भिम गुरुङबाट २५ हजार ५१, गिता गुरुङबाट ५ हजार ५ रुपैयाँ विद्यालयलाई प्राप्त भएको हो।
“सुनौलो भविष्यको पुकार, शिक्षा नै हो आधार” भन्ने मुल नाराका साथ तीनदिनसम्म आयोजित महोत्सवमा मकाउबाट जंग गुरुङ, मिन गुरुङ र सन्तको कान्छाबाट एकमुष्ट ५० हजार, इराकबाट धन वहादुर गुरुङ र कमान सिंह गुरुङबाट ३० हजार र साउदी आरबबाट गुन्जमान गुरुङले नगद ५ हजार १ सय ११ रुपैया सहयोग गर्नुभएको छ।
महोत्सवबाट प्राप्त रकमले विद्यालयमा गरिव तथा जेहेन्दार र अल्पसंख्यक विद्यार्थीहरुको लागि छात्रवृति स्थापना गर्ने, विद्यालयमा आधारभूत कम्प्युटर शिक्षा संचालन, प्राथमिक स्वास्थ्य सेवाको व्यवस्था गर्ने लगायतका कामहरुमा खर्च गरिने बताइएको छ।
यसअघि, विद्यालयको महोत्सवमा गुरुङहरुको लोपोन्मुख घाटु प्रदर्शन, गाउँस्तरिय झाँकी तथा पञ्चेबाजा प्रस्तुति र विद्यालय तथा समाजमा विशेष योगदान पुर्याउनेहरुलाई सम्मान एवम् अन्य विविध कार्यक्रमहरु भएका थिए।
विद्यालय व्यवस्थापन समितीका अध्यक्ष केश वहादुर गुरुङको अध्यक्षता र आदिवासी जनजाति समन्वय परिषद कास्कीका उपाध्यक्ष मन वहादुर गुरुङको प्रमुख अतिथ्यतामा भएको समापन कार्यक्रममा विद्यालयका प्रध्यानाध्यापक यम वहादुर गुरुङ, थन्कु देउराली युवा क्लवका अध्यक्ष दिल्ली सिं गुरुङ, आमा समूहका अध्यक्ष देउकाउरी गुरुङ, पार्चे वडा नम्वर ३ का आमा समूहका अध्यक्ष माया देवी गुरुङ, श्रीप्रसाद गुरुङ, टिकाराम गुरुङ्ग र पार्वती गुरुङलगायतले बोल्नुभएको थियो।
एचकेनेपाल डट कम संवाददाता-
काठमाडौ, ९ फागुन । नेकपा एमालेले आगामी फागुन २१ देखि २३ गतेसम्म राजधानीमा आयोजना हुने पार्टीको पहिलो राष्ट्रिय प्रतिनिधि परिषदको बैठकको सम्पूर्ण तयारी पुरा भएको जनाएको छ।
एमाले उपत्यका विशेष समन्वय समितिले मंगलबार रिपोर्टर्स क्लब नेपालमा पत्रकार सम्मेलनको आयोजना गरेर बैठकको लागि राजेन्द्र श्रेष्ठको संयोजकत्वमा उपत्यका ब्यवस्थापन र अनुगमन समिति, विनोद श्रेष्ठको संयोजकत्वमा जनपरिचालन तथा स्वयंमसेवक समिति, विजय पौडेलको संयोजकत्वमा आर्थिक समिति, रामेश्वर फुयालको संयोजकत्वमा प्रसाशनिक सम्पर्क समिति, ममता गिरीको संयोजकत्वमा प्रचार समिति, हरिदत्त जोशीको संयोजकत्वमा मन्च ब्यवस्थापन, सानुकुमार श्रेष्ठको संयोजकत्वमा साँस्कृतिक, सुशीला नेपालको संयोजकत्वमा स्वास्थ्य र जीवनराम श्रेष्ठको संयोजकत्वमा आवास तथा खाद्य समिति गठन गरी सम्पूर्ण तयारी पुरा गरिएको जानकारी दिएको हो।
समितिले परिषद बैठकको उद्घाटनको दिन फागुन २१ गते राजधानीमा ब्यापक जनप्रदर्शनसहित शक्ति प्रदर्शन गर्न राजधानीमा मानवसागर उतार्ने गरी सम्पूर्ण तयारी गरेको जानकारी राजेन्द्र श्रेष्ठले दिए। उनले फागुन २१ गतेको जनप्रदर्शन अहिलेसम्मकै सबै भन्दा बृहत हुने दावीसमेत पत्रकार सम्मेलनमा गरे।
श्रेष्ठले तीन दिने बैठक आयोजनाको लागि पारदर्शी ढंगले आर्थिक संकलन गरिएको दावी गर्दै पार्टीले प्रत्येक संगठित सदस्यबाट जनही १ सयको दरले सहयोग संकलन गरिएको बताए। त्यसैगरी, बैठकको सफलताको लागि देशैभरी अहिले विविध चेतनामूलक कार्यक्रम भईरहेको, पदयात्रा र घरदैलो कार्यक्रम सुरु भएको , फागुन १० गतेदेखि साँस्कृतिक र कोणसभा सुरु गर्ने, फागुनको तेस्रो साता मोटर साईकल र्याली र दौड जुलुस आयोजना गर्ने , फागुन १८ गतेदेखि सबै विद्युतीय सन्चारमाध्यमको प्रयोग गरी प्रचार प्रसार गर्ने कार्यक्रम एमालेको छ।
सामान्तवादको अन्त्य गरौं, लोकतान्त्रिक संविधान निर्माण गरौं भन्ने नारासहित आयोजना हुने बैठकको उद्घाटन समारोहका लागि काठमाडौका १५ वटै निर्वाचन क्षेत्रबाट एक एक जुलस शीर्षनेताहरुको नेतृत्वमा खुलामञ्चमा आएर सभामा परिणत हुने तयारी पनि आयोजकले गरेको पत्रकार सम्मेलनमा जानकारी दिए।
बैठकले नेकपा एमालेलाई राष्ट्रिय राजनीतिको पहिलो शक्तिको रुपमा स्थापित गर्ने विश्वास ब्यक्त गर्दै श्रेष्ठले यसले एमालेको बर्तमान ऐजेण्डा र भावी रणनीति तय गर्ने दावी गरे।
एचकेनेपाल डट कम संवाददाता-
काठमाडौ, ९ फागुण । आदिवासी जनजातीको आरक्षण कटौती गरी मधेसीलाई दिने गरी तयार पारिएको समावेशी विद्येयक फिर्ता लिन थारु संघ संगठनहरुले सरकारलाई १५ दिने अल्टिमेटम दिएका छन्।
थारु कल्याणकारी सभा, थारु राष्ट्रिय मुक्ती मोर्चा, लोकतान्त्रिक थारु संघ, लोकतान्त्रिक समाजवादी दल, पूर्वी थारुवान कोचिला राज्य संयूक्त संर्घष समिति, राष्ट्रिय प्रजातान्त्रिक थारु संगठन, संघीय लोकतान्त्रिक राष्ट्रिय मञ्च, थरुहट तराई पार्टी नेपाल, थारु महिला जागरण केन्द्र र थारु विद्यार्थी समाज सम्मिलित थारु संयूक्त संर्घष समितिले मंगलबार रिपोर्र्टर्स क्लब नेपालमा पत्रकार सम्मेलनको आयोजना गरेकार १५ दिने अल्टिमेटम दिएको हो।
पत्रकार सम्मेलनमा समावेशी विद्येयकको खारेजी र तराईका भूमिपुत्र थारुलाई मधेसी बनाउने षडयन्त्र १५ दिनभित्र अन्त्य नगरिए सशक्त आन्दोलन सुरु गर्ने चेतावनी दिएको छ।
पत्रकार सम्मेलनमा बोल्दै सभासद रुक्मिनी चौधरीले थारुहरुको पहिचान नष्ट गर्ने गरी थारु भूमिलाई मधेसी भूमि बनाउने षडयन्त्र भईरहेको दावी गर्दै १५ दिनभित्र आफूहरुको माग पूरा नगरिए संविधानसभामा रहेका ३७ जना थारु सभासदहरुले संसद अवरुद्ध गर्ने चेतावनी दिईन्। उनले चितवन, सुनसरी, मोरङ, झापा, उदयपुर, कैलाली र कन्चनपुरलगायतका थारुहरुको थाकथलोलाई निमिट्यान्न पार्ने षडयन्त्र भईरहेकोले त्यसविरुद्ध सडक र सदनबाट आन्दोलन गर्न आफूहरु बाध्य भएको दावी गरिन्।
थारुहट तराई पार्टी नेपालका अध्यक्ष लक्ष्मण थारुले सरकारले थारुहरुको पहिचानको विषयमा निरकुंश ढंगले अगाडि बढेर राष्ट्र र राष्ट्रियतामाथि घात गरे मुलुकलाई विखण्डनतिर लैजान लागेको दावी गर्दै थारुहरुले संयुक्त रुपमा त्यसको प्रतिकार गर्ने चेतावनी दिए। उनले मधेसी र थारु समूदायबीच भिडन्तको अवस्था नआओस भनेर १५ दिने अल्टिमेटम दिईएको स्पष्ट पार्दै सो अवधिमा समावेशी विद्येयक फिर्ता सहितका माग पुरा नभए आन्दोलनबाटै प्रधानमन्त्रीलाई कुर्सिबाट ढाल्ने चेतावनी दिए।
उनले थरुहट, आदिबासी जनजाती, दलित र महिलाको आन्दोलनका घाईतेलाई बेवास्ता गरेर जनयूद्धका घाईतेलाई मात्रै सरकारले राहत दिन लागेको प्रति आक्रोस ब्यक्त गर्दै अन्य आन्दोलनको अपमान आफूहरुलाई सह्य नभएको बताए।
थारु कल्याणकारीणी सभाका अध्यक्ष चन्द्र कुमार चौधरीले तराईलाई मधेस बनाउने योजना राष्ट्रघाती भएको भन्दै १५ दिनभित्र आफूहरुको माग पुरा नभएको थारु आन्दोलनबाटै सरकार ढाल्ने चेतावनी दिए।
रूद्र श्रीसमगर / एचकेनेपाल डट कम-
पोखरा, ९, फाल्गुण । नेपाल मगर सङ्घ कास्कीले सङ्घको ३० औं स्थापना दिवस एवम् मगर दिवस (फाल्गुण १५) भव्यतापूर्वक मनाउने तयारी गरेको छ।
पोखरा सभागृहबाट बाजागाजा र झाँकीसहितको र्याली सुरु भई नयाँसडक, वीपीचोक, चिप्लेढुङ्गा, भीमसेनचोक, नयाँबजार, लखनचोक हुँदै पुनः पोखरा सभागृहमा आई सभामा परिणत हुने सङ्घका अध्यक्ष पूर्णबहादुर रानामगरले जानकारी दिनुभयो।
पर्यटन तथा नागरिक उड्डयन मन्त्री लोकेन्द्र विष्टमगरले सम्बोधन गर्ने कार्यक्रममा ८० वर्ष माथिका मगर वृद्धवृद्धा सम्मान, संरक्षक एवम् सङ्घका सम्पूर्ण एकाई समितिहरूलाई प्रमाणपत्र वितरण, तारा खेल तथा नृत्य प्रतियोगिताका विजयी प्रतियोगीहरूलाई पुरस्कार तथा प्रमाणपत्र र सम्मानपत्र वितरणलगायतका कार्यक्रम पनि राखिएको रानामगरले जानकारी दिनुभयो।
सो अवसरमा मगर समुदायमा प्रचलित मौलिक नृत्यहरू, हास्यव्यंग्य प्रस्तुति, विभिन्न ख्यातीप्राप्त कलाकारहरूको सांगीतिक प्रस्तुतिका साथै मगर भेषभूषा, मगर परिकार र मगर भाषामा लिखित र मगर जातिसम्बन्धी पत्रपत्रिका एवम् पुस्तकहरूको स्टलहरूसमेत राखिने जनाइएको छ।
एचकेनेपाल डट कम संवाददाता-
भर्जिनियाको बर्कमा स्थानीय तामांग सोसाईटीको आयोजनामा आईतबार भब्यरुपमा ल्होसार कार्यक्रम सम्पन्न भएको छ।
संयुक्त राज्य अमेरिकाका लागि नेपाली राजदूत डा. शंकरप्रसाद शर्मा मुख्य अतिथि रहेको कार्यक्रममा ल्होसारको शुभकामना व्यक्त गर्दै राजदूत शर्माले अमेरिकामा यसरी ल्होसार मनाईनु सबै नेपालीलाई आफ्नो संस्कृति र पर्बप्रति जागरुक रहेको सन्देश दिनु हो भन्नु भयो।
ल्होसारको लागि बिशेष रुपले सिंगारिएको हल स्थानीय नेपाली संघ संस्थाका प्रतिनिधिहरुसहित अमेरिकाको राजधानी वाशिंगटन डीसी र वरपरका तामांग समुदाय र अन्य वासिन्दाहरुले खचाखच भरिएको थियो। तामांग सोसाईटी ग्रेटर वाशिंगटनका न्यु योर्कस्थित सोंगे संगठन तामांग सोसाईटी अमेरिकाका अध्यक्ष भरत लामा टोलीको डम्फु सेलोको प्रस्तुतिले समारोहलाई अझ लोह्सारमय बनाएको थियो।
कार्यक्रममा स्थानीय कलाकारहरु तथा अतिथि कलाकारहरुले नृत्य र गीत प्रस्तुत गरेर सबैलाई नचाएका थिए। तामांग संस्कृतिको एउटा झल्को प्रस्तुत गर्ने जमर्कोमा बिहे मंगनी रीमठीम शीर्षकमा एउटा लघु नाटक पनि मंचन गरिएको थियो।
बार्षिक रुपमा तामांग समुदायले मनाउदै आएको ल्होसारमा गत वर्ष झैँ यस वर्ष पनि बृहत नेपाली समुदायका साथै अमेरिकी नागरिकहरुको पनि सहभागिता थियो।
उद्घाटन समारोह तामांग सोसाईटी ग्रेटर वाशिंगटनका अध्यक्ष श्रीलाल मोक्तानको सभापतित्वमा भएको थियो। आरम्भमा निवर्तमान तथा संस्थापक अध्यक्ष श्याम लामा वलले स्वागत जनाउनु भएको थियो। महिलाहरुद्वारा मानी मल्हम प्रार्थनावाट शुरु गरिएको समारोह लामा गुरुको पूजापछि औपचारिक कार्यक्रम संस्थाका उपाध्यक्षा बीना लामा र सचिव राज तामांगले संचालन गरेका थिए।
