देश/ विदेशको समाचारः एचकेनेपाल डट कम

प्रधानमन्त्रीका प्रत्यासी खनालको पक्षमा दायर रिटमा बहस जारी

July 30th, 2010

एचकेनेपाल डट कम संवाददाता-
प्रधानमन्त्री पदको निर्वाचनमा उम्मेदवारी फिर्ता लिइनुभएका नेकपा(एमाले) अध्यक्ष झलनाथ खनालले तेस्रो चरणको निर्वाचनमा भाग लिन पाउनुपर्ने माग गर्दै सर्वोच्च अदालतमा दायर रिटको बहस हिजो सुरु भई आज पनि जारी हुने भएको छ।

न्यायाधीश बलराम केसीको एकल इजलासमा हिजोको बहस नसकिएकाले शुक्रबारका लागि हेर्दाहेर्दैमा राखिएको हो।

व्यवस्थापिका–संसदमा यही साउन ५ गते भएको सो निर्वाचनमा प्रस्ताव पेस भइसकेपछि फिर्ता लिने कानुनी व्यवस्था नभएको भन्दै अध्यक्ष खनालको उम्मेदवारी कायम गर्न कुमार आचार्य, भविश्वर गुरुङ्, रमेशप्रसाद खनाललगायतका कानुनव्यवसायीले संयुक्तरूपमा रिट दायर गर्नुभएको थियो।

हिजोको बहसमा प्रस्ताव फिर्ता लिने काम संविधानसम्मत नदेखिएको, व्यवस्थापिका–संसदको कार्यव्यवस्था नियामावली २०६५ संविधानको धारा ६८ भन्दा बाहिर गएर काम गर्नसक्ने स्थिति नरहेको, प्रस्ताव फिर्ता लिने प्रक्रिया हुबहु पालना नगरी संविधानसभाका अध्यक्षले मौखिकरूपमा प्रस्ताव फिर्ता लिन निर्देशन दिएको दाबी गर्दै साउन १७ गते हुने निर्वाचनमा हस्तक्षेप गरी अध्यक्ष खनालको उम्मेदवारी पुनः कायम गराउनुपर्नेमा अधिवक्ताले जोड दिएका थिए।

Popularity: 9%

Entry Filed under: News