देश/ विदेशको समाचारः एचकेनेपाल डट कम

हलेसी बिबिक्यु पार्टीका फोटोहरु र केही शब्दहरु

July 4th, 2005

- पशन तमू
केही समय यता ब्लग साइट थप भए पछि मलाई केही सहज महसुस भएको छ र मलाई स्वतन्त्र रुपले लेख्न सजिलो भएको छ ।

यो पृष्ठभित्र प्रवेश गरेपछि यहांहरुलाई शुरुमा अल्लमल्ल पर्नु स्वाभाविकै हो । किन भने यहां तपाईले कतै समाचार जस्तो सामाग्री देख्नु हुन्छ त कतै वेकम्मफुसे गफ मात्र देख्नु हुने छ र कतै साहित्यिक लेख-रचनाहरु पनि देख्नु हुनेछ ।

हाम्रा सबै पाठकहरु मात्र समाचार पढ्ने उद्धेश्यले आउंदैनन । कोही बर्षौंदेखि हराएका आफ्ना साथी भाईका खोजि गर्न पनि यहांसम्म आएका हुन्छन् त कोही नयां साथीहरु बनाउंन पनि आउंछन् । कोही रसरंग र रमाइलो गर्न पनि आउंछन् त कोही आफ्ना विचार र भावना साट्न पनि आउंछन् ।

त्यतिमात्र होइन, आफ्ना कला, सिप र प्रतिभाहरुलाई देखाउंन पनि यहां आएका हुन्छन् । लेख्नु पनि कला हो, फोटो खिच्नु पनि कला हो र फोरममा आफ्ना विचार र तर्कहरु उठाएर सबैलाई आफूतिर आकृष्ट गर्नु पनि कला हो । फोरमको कुरा गर्दा मैले जियालाई सम्झेको छु । उनी कुराकानी फोरम का सबभन्दा सक्रिय युवती पनि हुन् । उनी यही हंगकंगबाट नै आएकी । उनले एक दिन विभिषण राईको पक्षमा बोलेर मलाई उनीद्धारा सम्प्रेषित फोटोहरु किन अफडेट गरिएन कारण चाहिइयो भनेर च्याट बक्समा पोष्ट गरेकी रहेछिन् ।
एक क्षण त मेरो दिमाग खराव भयो । उनले मसंग ठाडै कारण माग्दा । र सम्झंदै गएं स्वाभाविक छ उनको आक्रोस ..। शुरुमा मैले केही समान रुची भएका साथीहरुसंग सल्लाह गरेर www.HKNepal.com स्थापना गरेको थिएं । एक बर्ष भयो यो साइट सञ्चालनमा आएको । यो नेपाल र नेपालीहरुका निम्ती छोटो समयमै अत्यन्त लोकप्रिय भयो । म उहांहरु सबैलाई हार्दिक धन्यवाद दिन्छु ज-जसले यो साइटको भलो चाहे र यसलाई निर्विवाद
प्रेम गरे ।

शुरुमा हामी केही साथीहरुको सक्रियतामा सञ्चालनमा आए पनि अहिले आएर सबैको आफ्नै साझा प्लेट फर्म भएको छ । मनको भारी बिसाउंने साझा चौतारी भएको छ र यसलाई सबैले आफ्नै ठानेको छ । यो साइटलाई हंगकंगमा बस्ने नेपालीहरुले त आफ्नै स्वाभिमान, गौरव र प्रतिष्ठा नै ठानेका छन् ।

त, कुरा हुदै थियो जियाको । हो उनलाई अधिकार छ आफ्नो आक्रोश पोख्न । किन भने फोरममा विभिन्न विषय बस्तुहरुको उठान गरेकी छिन् उनले । सक्रियता देखाएका छिन् उनले । यो साइटलाई लोकप्रिय बनाउंनमा उनको पनि कही न कंही योगदान रहेको छ । जिया जस्तै थुप्रै युवा - युवतीहरुको योगदान रहेको छ । त्यस कुरालाई मैले भुल्नु हुदैन ।

तर हाम्रा पनि केही वाध्यताहरु छन् । प्राविधिक कठिनाईहरु आई पर्छन् बेला बखत । कहिलेकांही सेर्बरमा समस्या पर्छ । सफ्टवेयरहरुले काम गर्दैनन् । र सबैलाई थाहा भएको अर्को कुरा हो समयको । व्यस्तताले भनेकै बेला केही गर्न सक्तैन कहिलेकंाही । र यी सबै अफ्ठ्यारा र वाध्यताहरुसंग संघर्ष गरेर भएपनि हामीले हामी सबैका निम्ति केही न केही दिने जमर्को गरिरहेका छौं अद्यावधि ..। त्यस्ता पक्षहरुलाई जिया जस्ता अन्य सहकर्मी वा सुभचिन्तकहरुले पनि बुझ्नु जरुरी छ । हामी सबैले आफ्नै निम्ति केही न केही गरिरहेका छौं होइन र ..

मैले यस पल्ट एक जना नयां फोटोग्राफर बिभिशन राईले खिचेका फोटोहरु समावेश गरेकोछु । खोटांग हलेसी बिबिक्यु पार्टीका फोटोहरु । यहांहरुलाई कस्तो लाग्छ आफ्ना प्रतिक्रियाहरु राख्न नभुल्नु होला ।

हलेसी बिबिक्यु पार्टीका फोटोहरु हेर्न यहां क्लिक गर्नुहोस् ।

Popularity: 24%

Entry Filed under: देश/ विदेश, Entertainment, Hong Kong News