देश/ विदेशको समाचारः एचकेनेपाल डट कम

द्वन्द्वपीडित कमलाको दुःख

November 19th, 2008

एचकेनेपाल डट कम काठमाडौँ प्रतिनिधि-
पाँच वर्षअघि पति गुमाएकी उदयपुर लेखगाउँ-३ चिसापानीकी २४ वर्षीया कमला गिरी क्षतिपूर्ति नपाएपछि काखमा दूधे बच्चा च्यापेर सोमबार धुरु धुरु रुँदै माइतीको शरणमा गएकी छिन् ।

आफूसँग विवाह दर्ताको प्रमाणपत्र नभएपछि क्षतिपूर्ति पाउनबाट बञ्चित कमला तीन वर्षसम्म न्यायमाग्दै गाईघाटका सडक र सङ्घ-संस्थाहरूमा हात जोड्दै हिडिन् तर कोहीबाट पनि सहारा नपाएपछि उनी माइत गएकी हुन् ।

कमलाका अनुसार कामको खोजीमा पोखरा गएको बेला कास्की हिङ्जा गाविस घर भई सैनिक पृतना हेडक्वार्टर पोखरामा कार्यरत सैनिक जवान राजन अधिकारीसँग २०६१ सालमा उनको प्रेम विवाह भएको थियो । विवाह भएको नौ महिना पनि बित्न नपाउँदै २०६२ कात्तिक २७ गते स्याङ्जातर्फगस्ती गएको बेला माओवादीले थापेको एम्बुसमा परी पति राजनको मृत्युभएको उनी बताउँछिन् ।

क्षतिपूर्तिका लागि पटक पटक पृतना हेडक्वार्टरमा गए पनि प्रमाणको अभावमा उनले बहालवाला सैनिक भिडन्तमा परी निधन हुँदा पाउने सुविधा केही पनि पाइनन् । धेरै पटक धाउँदा पनि पृतनाबाट रित्तै फर्काइएपछि एक्लै पोखरामा बस्न नसकी तीन महिनापछि गाईघाट आएर विभिन्न मानवअधिकारवादी सङ्घ-संस्थालाई पहल गरिदिन अनुरोध गरेको उनी सुनाउँछिन् ।

“श्रीमानले केही दिनपछि बिदा मिलाएर दुवै जना घर जाने र विवाह दर्ता गर्ने भनेका थिए तर बीचैमा त्यस्तो भयो”- गहभरी आँशु पार्दै पीडित कमलाले वेदना सुनाईन् । उनलाई मृतक पतिको नाम बाहेक न त सासु ससुराको नाम नै थाहा छ, न स्पष्ट घरको ठेगाना नै थाहा छ ।

यता माइतीले समेत अर्काको घरमा गईसकेकी छोरीलाई घरमा बस्न दिने हुन् कि होइनन् उनलाई थाहा छैन ।

Recent Videos:

Popularity: 15%

Entry Filed under: News