देश/ विदेशको समाचारः एचकेनेपाल डट कम

लोपोन्मुख जातिलाई प्रतिव्यक्ति रु पाँच सय दिइने

December 31st, 2008

एचकेनेपाल डट कम संवाददाता-
स्थानीय विकासमन्त्री रामचन्द्र झाले नेपालका सम्पूर्ण लोपोन्मुख १० जाति तथा समुदायको उत्थानका लागि प्रतिव्यक्ति रु.५ सय सरकारले सहयोग दिने योजनासहित प्रत्येक गाविसमा बजेट पठाइसकिएको जानकारी दिनुभएको छ।
मन्त्री झाले सुनसरीको धरान-१८ मा नेपाल बौद्ध गुम्बा तथा तमु छोजधींद्वारा आयोजना गरिएको २५९३ औँ तमु ल्होसार पर्वका अवसरमा सो जानकारी दिनुभएको हो ।

उक्त अवसरमा मन्त्री झाले स्थानीय तहको सम्पूर्ण सरकारी कामकाज स्थानीय भाषाबाट नै काम गर्ने वातावरण निर्माणका लागि निर्देशिका जारी गरिसकिएकाले अब सबै जाति तथा जनजातिले स्थानीय तहमा सरकारी काम गर्दा आफ्नै भाषामा गर्नसक्ने स्थिति निर्माण भएको बताउनुभयो ।

मन्त्री झाले अन्तराष्ट्रिय महासन्धि १६९ बमोजिम सबै समुदायको समान विकास तथा अवसर प्रदान गर्नका लागि धेरै व्यवधान विद्यमान रहेकाले ती व्यवधान अन्त्य गर्ने विषयमा पनि सरकारले पहल गरिरहेको जानकारी दिनुभयो ।

अर्को प्रसङ्गमा मन्त्री झाले भौगोलिक, जातीय र क्षेत्रीय आधारमा आत्मनिर्णयसहितको स्वायत्त सङ्घीय राज्य माग गर्ने केही समूहले राज्यलाई विखण्डनतिर धकेल्ने प्रयास गरिरहेकोतर्फ सरकार सचेत रहेको स्पष्ट पार्नुभयो।

Recent Videos:

Popularity: 13%

Entry Filed under: News