झापामा ट्रक आगजनी प्रकरण: प्रसाईंका दुई समर्थक पक्राउ

काठमाडौं, दुई वटा भारतीय नम्बर प्लेटका ट्रकमा आगजनी गरेको आरोपमा प्रहरीले दुर्गा प्रसाईंका दुई जना समर्थकलाई पक्राउ गरेको छ।

जिल्ला प्रहरी कार्यालय झापाका प्रवक्ता एवं डिएसपी कृष्ण चन्दका अनुसार, पक्राउ पर्नेहरूमा हल्दीवारी गाउँपालिका-१ का ४० वर्षीय भीम लिम्बू तुम्वापो र बिर्तामोड नगरपालिका-७ का ३९ वर्षीय विजय चौधरी रहेका छन्।

कन्काई नगरपालिका-८ स्थित पूर्वपश्चिम राजमार्गको बिरिङ खोलाको पुलमा युपी ५७ एटी ४४९३ नम्बरको ट्रक र बिर्तामोड नगरपालिका ६ गिरीबन्धु टी इस्टेटस्थित पूर्वपश्चिम राजमार्गमा डब्लुबी ७३ इ ३०५६ नम्बरको ट्रकमा आगजनी भएको थियो।

आगजनीबाट घाइते भएका दुवै ट्रक चालकहरूको उपचार भइरहेको जिल्ला प्रहरी कार्यालय झापाले जानकारी दिएको छ।

पक्राउ परेका दुवै व्यक्तिमाथि अपराधिक उपद्रव र ज्यान मार्ने उद्योगको मुद्दा दर्ता गरी अनुसन्धान अघि बढाइएको छ। केही अन्य संदिग्ध व्यक्तिहरू फरार रहेको र उनीहरूको खोजी कार्य जारी रहेको प्रहरीले जनाएको छ।