न्युज डेस्क / एचकेनेपाल डट कम –
हङकङ, २३ जनवरी। आज बिहान ८:५० बजे मोटरसाइकल भ्यानसंग ठोक्किदा पाकिस्तानी मोटरसाइकल चालकको मृत्यु भएको छ। लान्ताउको दक्षिणतर्फको तुङ चुङ रोडमा एक मोटरसाइकल र भ्यान एक आपसमा ठोक्किदा मोटरसाइकल चालक गम्भीर घाइते भएका थिए।
उद्धारकर्मीहरूले करिब ४० वर्षीय पाकिस्तानी मोटरसाइकल चालकलाई नर्थ लान्ताउ अस्पताल लगेका थिए। तर उपचारको क्रममा उनको मृत्यु भएको पुष्टि भएको छ। प्रहरीले दुर्घटनाको कारण अनुसन्धान गरिरहेको छ।
अनलाइनमा प्रसारित भिडियो र तस्विरहरूमा देखिए अनुसार मोटरसाइकल चालक सडकमा लडेर बेहोस अवस्थामा थिए। भ्यानको अगाडिको भाग पूर्ण रूपमा क्षतिग्रस्त भएको र अगाडिको विन्डस्क्रिन फुटेको थियो।
घटनास्थलका अनुसार त्यस क्षेत्रमा धेरै घुम्तीहरू छन् र घुम्ती पार गरेपछि सिधा सडक छ। घटना हुँदा मोटरसाइकल लान्ताउको उत्तरतर्फ ओरालो झर्दै थियो। मुई वोतर्फ जाँदै गरेको भ्यानसँग मोटरसाइकल ठोक्किएको थियो।
