एचकेनेपाल डट कम –
काठमाडौं, १ असोज २०८२ । कोटेश्वरस्थित भाटभटेनी सुपरमार्केटमा बुधबार थप एक डढेको शव फेला परेको छ। यो घटनासँगै जेनजी आन्दोलनका क्रममा ज्यान गुमाउनेको संख्या ७४ पुगेको छ।
जिल्ला प्रहरी परिसर, काठमाडौंका प्रवक्ता एसपी अपिलराज बोहराले दिएको जानकारीअनुसार फेला परेको शव पूर्णरूपमा जलेको अवस्थामा छ, जसको पहिचान अझै हुन सकेको छैन।
यसअघि चुच्चेपाटीस्थित भाटभटेनी सुपरमार्केटबाट ७ वटा जलेका शव फेला परेका थिए। ती शवहरू हाल त्रिवि शिक्षण अस्पताल, महाराजगञ्जमा राखिएको छ र तिनको पहिचान पनि अझै खुल्न सकेको छैन। प्रहरीका अनुसार मृतकहरूको पहिचानका लागि डीएनए परीक्षण प्रक्रिया सुरु गरिएको छ।
