न्युज डेस्क / एचकेनेपाल डट कम –
हङकङ, २५ जनवरी। हङकङमा जनवरी २५ (अर्थात् आज) देखि नयाँ नियम लागू हुँदैछ। अब बस र कमर्सियल गाडीहरूमा जहाँ सिट बेल्ट फिटेड छ, त्यहाँ यात्रु र ड्राइभर दुवैले सधैं सिट बेल्ट लगाउनुपर्छ। छोटो यात्रा भए पनि, सिट बेल्ट लगाउनै पर्छ।
यो नियमले दुर्घटनामा मृत्यु र गम्भीर चोटको जोखिम धेरै घटाउँछ भन्ने कुरा प्रमाणित भएको छ।
यदि सिट बेल्ट फिटेड छैन वा बिग्रिएको छ भने, तुरुन्तै ड्राइभरलाई भन्नुपर्छ र अर्को राम्रो सिटमा सर्न सकिन्छ भने सर्नुपर्छ। बच्चा सानो छ र एक्लै बस्न सक्दैन भने आफ्नो बेल्ट लगाएर बच्चालाई काखमा राम्ररी समातेर राख्नुपर्छ। ठूला बच्चाले भने आफ्नो सिट बेल्ट लगाउनुपर्छ।
उभिएका यात्रुहरूलाई बेल्ट लगाउनुपर्दैन, तर उनीहरूले सधैं ह्यान्डरेल समात्नु पर्छ, हिँडडुल नगर्ने, फोन हेरेर नबस्ने जस्ता कुरा ध्यान दिनुपर्छ।
यो नियम तोडेमा जरिवाना अधिकतम ५,००० हङकङ डलरसम्म र ३ महिनासम्म जेल पनि हुन सक्छ।
सुरुमा पुलिसले धेरैजसो सल्लाह र चेतावनी दिन्छ, जरिवाना तुरुन्तै दिँदैन। यदि कुनै वैध कारणले बेल्ट लगाउन नसकेको छ भने स्पष्टसँग भन्न सकिन्छ, पुलिसले न्यायपूर्ण तरिकाले हेर्छन्।
बस कम्पनीले पनि यात्रुलाई रिमाइन्डर दिन सक्छन्, तर यो व्यक्तिगत जिम्मेवारी हो। सुरक्षित रहन यो नियम पालना गर्नु राम्रो हुन्छ।
