न्युज डेस्क / एचकेनेपाल डट कम –
हङकङ, ३० जुलाई। सन् २००८ देखि २००९ सम्म भएको एउटा ठूलो घुसखोरी र मानव तस्करी काण्डमा संलग्न क्याथे प्यासिफिक एयरलाइन्सका पूर्व कर्मचारी त्सुई यिङ-किटलाई अदालतले २० महिनाको जेल सजाय सुनाएको छ।
यो घटनापछि उनी १५ वर्षसम्म कानुनबाट बच्न फरार रहेका थिए।
अक्टोबर २००९ मा अदालतबाट धरौटीमा छुटेपछि ४५ वर्षीय त्सुई हङकङबाट भागेर मुख्यभूमि चीनमा लुकेर बसेका थिए। लामो समय फरार रहेपछि उनी गत वर्ष अर्थात् जुलाई २०२५ मा चीनबाट हङकङ फर्किएर हङकङको भ्रष्टाचार विरोधी निकाय (ICAC) मा आफैं आत्मसमर्पण गर्न पुगेका थिए।
घटनाको विवरण अनुसार, त्सुईले क्याथे प्यासिफिकमा भुइँ दल (ग्राउन्ड स्टाफ) को रूपमा काम गर्दा आफ्ना अन्य दुई सहकर्मीहरूसँग मिलेर मानव तस्करहरूको समूहलाई सघाएका थिए।
उनीहरूले एयरलाइन्सको कम्प्युटर प्रणाली प्रयोग गरेर उडान र सुरक्षा सम्बन्धी भित्री जानकारीहरू तस्करहरूलाई दिने गर्थे। यो जानकारीको मद्दतले कागजपत्र नपुगेका चिनियाँ यात्रुहरूलाई हङकङ विमानस्थलमा विना कुनै झन्झट चेक-इन गराउन र सुरक्षा जाँच पार गराउन सजिलो हुन्थ्यो।
यसबापत त्सुईले तस्कर समूहहरूबाट कम्तीमा १८ हजार हङकङ डलर घुस लिएको अदालतमा स्वीकार गरेका छन्। उनले विमान चढाउन सघाएका प्रति-यात्रु दुई हजार हङकङ डलरसम्म लिने गर्थे र त्यो रकम आफ्ना सहकर्मीहरूसँग बाँड्ने गर्थे।
बुधबार हङकङको अदालतले त्सुईलाई दोषी ठहर गर्दै २० महिनाको जेल सजाय सुनाएको छ। यसका साथै उनले घुस खाएको १८ हजार हङकङ डलर रकम क्याथे प्यासिफिक एयरलाइन्सलाई नै फिर्ता गर्नुपर्ने आदेश दिएको छ।
यस काण्डमा संलग्न भएका उनका अन्य चारजना सहकर्मीहरूलाई भने अदालतले सन् २०११ मा नै १४ देखि २० महिनासम्मको जेल सजाय सुनाइसकेको थियो।
