केसी आउन नमानेपछि जुम्ला जान लागेको हेलिकोप्टर रोकियो !

(फाईल फोटो)

१२ दिनदेखि अनशनरत डा. गोविन्द केसीलाई लिन बुधबार काठमाडौंबाट चिकित्सकसहितको टोली जुम्ला जाने तयारी भयो।

सेनाको हेलिकोप्टर जाने व्यवस्था मिलिसकेको थियो । तर, उड्ने तयारीमा रहेको हेलिकोप्टर काठमाडौंमै रोकियो।

आफू काठमाडौं नफर्किने जवाफ डा. केसीले फोनबाटै दिएपछि चिकित्सकसहितको टोली रोकिएको खबर नयाँपत्रिकाले छापेको छ।
नेपाल चिकित्सक संघका पदाधिकारीलाई केसीले यस्तो जवाफ दिएका हुन् ।

‘केसीले भेट्न मात्रै आउनू, लिन नआउनू भनेपछि हामी जानुको कुनै अर्थ र औचित्य थिएन,’ संघका महासचिव डा. लोचन कार्कीले भने, ‘उनलाई काठमाडौं ल्याएरै जीवनरक्षा गर्ने र मागबारे कुरा गर्ने योजना सरकारको भए पनि उनले नआउने अडान लिएपछि हामी पनि सरकारको आग्रह नकार्न बाध्य भयौँ ।’

शिक्षामन्त्री गिरिराजमणि पोखरेलको निर्देशनअनुसार नेपाल चिकित्सक संघका पदाधिकारी र प्रधानमन्त्रीकी निजी चिकित्सक डा. दिव्या सिंह हेलिकोप्टरमा जुम्ला जाने तयारी थियो।