काठमाडौँ । यस वर्षको ‘मधुपर्क सम्मान(२०८१’ प्रा कृष्ण गौतम (आख्यान र समालोचना) र मञ्जु काँचुली (पद्य) तथा ‘मधुपर्क प्रतिभा सम्मान(२०८१’ साहित्यकार किशोर पहाडीलाई प्रदान गरिएको छ ।
विसं २०५९ देखि दिन थालिएको ती सम्मान गोरखापत्र संस्थानको ५७ औँ वार्षिकोत्सवका अवसरमा आज समालोचक प्राडा वासुदेव त्रिपाठीको उपस्थितिमा प्रदान गरिएको हो ।
सम्मानित स्रष्टालाई सम्मानपत्र र जनही रु ५० हजार नगदसमेत प्रदान गरिएको छ । कार्यक्रममा नेपाल प्रज्ञा–प्रतिष्ठानका पूर्वउपकुलपति प्राडा त्रिपाठीले ‘गोरखापत्र’ र ‘मधुपर्क’ ले नेपाली साहित्यमा ठुलो योगदान पुर्याएको बताउँदै पछिल्लो साहित्यिक पत्रिका आद्योपान्त पठनीय सामग्रीयुक्त भएको र यसले पाठकको स्तर पनि उकासेको बताए ।
संस्थानका कार्यकारी अध्यक्ष विष्णुप्रसाद सुवेदीले संस्थाका प्रकाशन गुणस्तरीय बनाउने प्रयास गरिएको उल्लेख गर्दै तिनलाई ‘डिजिटल फम्र्याट’मा राखेर पाठकमैत्री बनाउन थालिएको जानकारी दिए । महाप्रबन्धक लालबहादुर ऐरीले नेपाली साहित्यको मानक ‘मधुपर्क’ मा योगदान गर्ने सबै स्रष्टा तथा पाठकप्रति सम्मान प्रकट गरे ।
साहित्यकार प्रमोद प्रधानले पुरस्कृत साहित्यकारको परिचय दिँदै पत्रिकाले नेपाली भाषा–साहित्यको प्रवद्र्धन गर्न, वाङ्मयको विकास गर्न र नेपाली साहित्यकारहरू जन्माउन योगदान दिएको बताए । संस्थानको साहित्यिक पत्रिका ‘मधुपर्क’ का निमित्त सम्पादक त्रिभुवनचन्द्र वाग्लेले साहित्यिक कृतिहरूको धेरै खर्च गरेर विमोचन गर्नाका सट्टा साहित्यिक पत्रिकाहरूमा विज्ञापन दिएर प्रचारप्रसार गर्न साहित्यकारहरूलाई आग्रह गरे ।
कार्यक्रमको दोस्रो चरणमा ‘मधुपर्क मन्थन’ अन्तर्गत स्रष्टा(द्रष्टा प्राडा.दयाराम श्रेष्ठ र सीता पाण्डे (आख्यान) र प्राडा लक्ष्मणप्रसाद गौतम र श्यामल (पद्य) ले सहभागीहरूसँग छलफल गरेका थिए ।
सो अवसरमा प्राडा श्रेष्ठले आख्यान खासगरी नेपाली कथा लेखनलाई रातो, निलो, पहेँलो आदि रङका माध्यमबाट विश्लेषण गरे । कथाकार पाण्डेले विदेशमा बसेर पनि आफूहरूले नेपाल र नेपाली साहित्यमै चिन्तन गरिरहेको जनाइन् ।
त्यस्तै प्राडा गौतमले नेपाली कविताले समय, समाज र मान्छेबारे बोले पनि त्यसको शाश्वतीकरण भने हुन नसकेको विचार राखे । कवि श्यामलले आजकलका नेपाली समालोचक एक सय १३ शब्दमै रुमल्लिएको र परम्परावादी मात्र भएको धारणा राखे । रासस
