हङकङमा त्रामी आँधी टाईफूनको संकेत नं. ३ आज दिनभर जारी रहने..

न्युज डेस्क / एचकेनेपाल डट कम –
हङकङ, २६ अक्टोबर। हङकङको वेधशालाले शनिबार बिहान १०:४० बजे जारी गरेको त्रामी आँधी टाईफूनको संकेत नं. ३ आज दिनभर जारी रहने जनाएको छ।

वेधशालाका अनुसार गम्भीर उष्णकटिबन्धीय आँधी त्रामी आज बिहान टाईफूनमा परिणत भएको छ र हङकङको दक्षिणतर्फ करिब ५०० किलोमिटर वा बढी दूरीमा छ।

बिहान ११ बजे त्रामी हङकङको दक्षिण-पश्चिममा करिब ५८० किलोमिटर टाढा रहेको अनुमान गरिएको थियो र यो पश्चिमतर्फ प्रति घण्टा १८ किलोमिटरको गतिमा दक्षिण चीन सागरको मध्य र उत्तरी भागबाट हैनान टापुको दक्षिणी समुद्रतर्फ अघि बढिरहेको छ।

त्रामी र उत्तर-पूर्वी मनसुनको संयुक्त प्रभावले गर्दा यससँग सम्बन्धित तेज हावाहरूले पर्ल नदी मुहानको वरिपरि क्रमशः असर गर्दैछन्।

मौसम विभागले त्रामी बाहिरिएपछि स्थानीय हावाहरू आज राति देखि भोलि (अक्टोबर २७) बिहानसम्म क्रमशः कमजोर हुने र त्यसपछि स्ट्यान्डबाय संकेत नं. १ जारी गर्ने विचार गरिरहेको जनाएको छ।

हङकङलाई प्रभावित पारेको टाइफुन त्रामीले फिलिपिन्समा ठूलो विनाश ल्याएको छ। हालैका रिपोर्टहरू अनुसार, टाइफुनको प्रभावका कारण मृत्यु हुनेको संख्या ६६ पुगेको छ। आँधीले फिलिपिन्सका विभिन्न क्षेत्रहरूमा भारी वर्षा, तीव्र हावा र बाढी ल्याएको थियो, जसले व्यापक विनाश र जनधनको क्षति गराएको छ।