हङकङमा अदालतका न्यायाधीशमाथि चक्कु आक्रमण प्रयास, तीन घाइते..

न्युज डेस्क / एचकेनेपाल डट कम –
हङकङ, ४ नोभेम्बर। काउलुन सिटी अदालतमा एक व्यक्तिले न्यायाधीश एडवर्ड वोङ चिङ-युमाथि चक्कुले आक्रमण गर्न खोज्दा तीन प्रहरी अधिकारी घाइते भएका छन्। सोमबार बिहान करिब १०:१५ बजे ३२ वर्षीय आरोपी लीले अदालत कक्षमा प्रवेश गरी न्यायाधीशमाथि आक्रमण गर्न खोजेका थिए।

लीले अदालत कक्षको सार्वजनिक दीर्घामा अचानक एउटा चक्कु निकालेर वोङमाथि आक्रमण गर्न खोजेका थिए। प्रहरीले आरोपी लीबाट ४ वटा धारिलो चक्कु बरामद गरेको छ र अदालत बाहिर उनको साइकल पनि जफत गरेको छ।

स्थानीय मिडियाका अनुसार, झडपमा तीन प्रहरी अधिकारी र आरोपी घाइते भएका छन्। एक प्रहरी अधिकारीको हातमा चोट लागेको छ भने अन्य दुईजनालाई खोस्रिएको र मर्किएको छ। उनीहरूलाई लीसँगै क्वीन एलिजाबेथ अस्पतालमा उपचारको लागि लगिएको छ।

आरोपी लीलाई पहिले न्यायाधीश वोङले यौन दुर्व्यवहार मुद्दामा दोषी ठहर गरेका थिए र उनले सजाय भुक्तान गरिसकेका थिए।

न्याय विभागले यस घटनाको कडा निन्दा गर्दै कुनै पनि गैरकानूनी वा हिंसात्मक कार्यलाई सहन नगर्ने बताएको छ। विभागले जनतालाई कानुनको शासनको सम्मान गर्न आग्रह गरेको छ र न्यायपालिका विरुद्ध कुनै पनि तोडफोड वा कानुनी शासनमा क्षति पुर्‍याउने कार्यलाई सरकारले सहन नगर्ने जनाएको छ।