ब्रेकिङ न्यूज: हङकङमा सामुद्रिक आँधी चेतावनी नम्बर ८ जारी, जनजीवन प्रभावित हुने..

न्युज डेस्क / एचकेनेपाल डट कम –
हङकङ, १३ नोभेम्बर। हङकङ मौसम विभागले आज राति ११:१० बजे उत्तरपूर्वी आँधी वा तुफान संकेत नम्बर ८ जारी गरेको छ। यसको अर्थ ६३ किलोमिटर प्रति घण्टा वा सोभन्दा बढी गतिको हावा चल्ने अपेक्षा गरिएको छ।

सरकारले सबै नागरिकहरूलाई यथाशीघ्र सुरक्षा उपायहरू अपनाउन, समुद्री किनारबाट टाढा रहन र जलक्रीडामा संलग्न नहुन आग्रह गरेको छ।

यस प्रकारको मौसमी अवस्थाले यातायात, व्यापार र दैनिक जीवनमा व्यापक असर पार्ने भएकोले सतर्कता अपनाउन अनुरोध गरिएको छ।

हङकङ मौसम विभागले जारी गरेको पछिल्लो अपडेट अनुसार, राति ११ बजे उष्णकटिबन्धीय आँधी तोराजी हङकङको दक्षिण-दक्षिणपूर्वमा करिब १७० किलोमिटर टाढा केन्द्रित थियो र पश्चिम वा पश्चिम-उत्तरपश्चिम तर्फ बिस्तारै पर्ल नदी मुहानको नजिक सर्दैछ।

तोराजी बिहीबार बिहान (१४ नोभेम्बर) पर्ल नदी मुहानको नजिक पुग्ने अनुमान छ, हङकङको दक्षिणमा करिब १५० किलोमिटर टाढा रहनेछ। आँधी चेतावनी संकेत नम्बर ८ कम्तीमा भोलि बिहान १० बजेसम्म जारी रहनेछ।

बिहीबार दिनभर बेलाबेलामा झरी पर्ने र सुरुमा भारी वर्षा हुने सम्भावना छ। समुद्र अत्यन्त खतरनाक हुनेछ। जनसाधारणलाई समुद्री किनारबाट टाढा रहन र जलक्रीडामा संलग्न नहुन सल्लाह दिइएको छ।

घरभित्र सुरक्षित रहन, सबै झ्याल ढोका बन्द गर्न, ठूला शीशाहरूमा टेप लगाउन र नियमित रूपमा मौसम अपडेट सुन्न वा हेर्न अनुरोध गरिएको छ।

शिक्षा ब्युरोले बिहीबार माध्यमिक विद्यालय, प्राथमिक विद्यालय, शारीरिक अपाङ्गता भएका बालबालिकाका लागि विद्यालय, बौद्धिक अपाङ्गता भएका बालबालिकाका लागि विद्यालय, बाल विद्यालय र बाल विद्यालय-सह-शिशु स्याहार केन्द्र लगायत सबै बिहानी र पूर्णकालीन विद्यालयहरूका कक्षाहरू स्थगित गरिने जानकारी दिएको छ।

सार्वजनिक यातायातको सन्दर्भमा, केएमबी र सिटीबसले रातको बस सेवा स्थगित गर्ने बताएका छन्।

गृह मामिला विभागले आवश्यकता परेकाहरूका लागि २५ भन्दा बढी अस्थायी आश्रयस्थल खोलेको छ।