काठमाडौं। मोटरसाइकल दुर्घटनामा परी त्रिशूली नदीमा बेपत्ता भएका भारतीय सेनामा कार्यरत २७ वर्षीय रोहित रानालाई खोज्न गोताखोर परिचालन गरिएको छ।
नारायणगढ-मुग्लिन सडकखण्डको इच्छाकामना गाउँपालिका-५ मा बिहान करिब साढे ११ बजे यो दुर्घटना भएको हो। राना एक्लै काठमाडौंतर्फ जाँदै गर्दा उनको मोटरसाइकल सडक छेउको डिभाइडरमा ठोक्किएको र उनी त्रिशूली नदीमा खसेको स्थानीय साक्षीहरूले बताएका छन्।
घटनास्थलमा तत्काल पुगेको प्रहरीले उनको पर्स, कागजात, लुगा र जुत्ता बरामद गरेको छ। सशस्त्र प्रहरी बलको विशेष गोताखोर टोलीले उनको खोजी कार्य तीव्र पारेको छ।
लमजुङ मूल घर भई हाल चितवनको भरतपुर महानगरपालिका-१ रामपुरमा बस्दै आएका रानाको परिवारजन घटनास्थलमा पुगिसकेका छन्।
