आफन्तलाई फोन गरेर ‘अलबिदा…!’ भन्दै आत्महत्या

काठमाडौं, ३२ जेठ । आफू विकास बैंकमा सहायक महाप्रबन्धक, श्रीमती सोही बैंकको शाखा प्रबन्धक । काँडाघारीमा घर । एक छोरासहितको सुखी परिवार ।

राम्रो जागिर, घर र सन्तान, आम नेपालीको ठूलो सपना हो । देव विकास बैंकका सहायक महाप्रबन्धक किरण घिमिरेसँग यी सबै कुरा थिए । तर, पनि उनको जीवन खुसी थिएन । केही समयदेखि डिप्रेसनमा थिए उनी ।

डिप्रेसनको औषधीसमेत सेवन गर्दै आएका थिए । सबै कुरा भएर पनि उनको जीवन खुसी थिएन । त्यसैले गत २६ जेठमा उनले आफन्त विनितामणी उपाध्ययलाई फोन गरेर भने, ‘म यो संसार छाड्दैछु, अलबिदा !’त्यसपछि उनको मोबाइल स्वीच अफ भयो ।

उपाध्यय हतार–हतार घरमा पुग्दा उनको कोठामा चुकुल लगाएको थियो । चुकुल फुटाएर हेर्दा उनी झुण्डिरहेका थिए । आफन्तलाई फोन गरी आफू आत्महत्या गर्न लागेको जानकारी दिएर घिमिरेले बुधबार बिहान आफ्नै घरमा आत्महत्या गरेको खबर दृष्टि साप्ताहिकले छापेको छ ।