काठमाडौं । भारतको जम्मुकश्मिरमा भएको आतंकवादी हमलाको नेपाल सरकारले कडा निन्दा गरेको छ । प्रधानमन्त्री केपी शर्मा ओलीले यस घटनाको कडा शब्दमा भत्सर्ना गर्दै नेपाल सधैं आतंकवाद विरुद्धको लडाईमा भारतको साथमा रहने प्रतिबद्धता जनाएका छन्।
मंगलबार जम्मुकश्मिरको प्रसिद्ध पर्यटकीय स्थल पहलगामको बैसारन क्षेत्रमा पर्यटकहरुमाथि लक्षित आतंकवादी आक्रमण भएको थियो । यस दुःखद घटनामा एक नेपाली नागरिकसहित विभिन्न देशका २७ जना निर्दोष नागरिकको ज्यान गएको छ।
प्रधानमन्त्री ओलीले सामाजिक सञ्जाल एक्समा लेखेका छन्, “पहलगाममा भएको कायरतापूर्ण आतंकवादी हमलाप्रति म गहिरो दुःख र आक्रोश व्यक्त गर्दछु । पीडित परिवारहरूप्रति गहिरो समवेदना । नेपाल सरकार र नेपाली जनता आतंकवाद विरुद्धको लडाईमा भारतको साथमा दृढतापूर्वक उभिएको छ।”
नेपाल सरकारले मृतक नेपाली नागरिकको पहिचान र उनको परिवारलाई आवश्यक सहयोग पुर्याउन भारतीय अधिकारीहरूसँग निरन्तर समन्वय गरिरहेको जानकारी दिएको छ । साथै, सरकारले सम्पूर्ण नेपाली नागरिकहरूलाई जम्मुकश्मिर क्षेत्रमा भ्रमण गर्दा विशेष सावधानी अपनाउन अपिल गरेको छ।
