राजविराज, सप्तरीको सुरुंगा नगरपालिका–८ मल्हनमा टोलमा बिहीबार राति भएको डकैतीको घटनामा एक जनाको मृत्यु भएको छ । मध्यरातमा करिब १२ बजेतिर टोलमा पसेका लुटेराको समूहले लुटपाट गर्ने क्रममा स्थानीय ५० वर्षीय कान्तलाल चौधरीको गोली प्रहारबाट मृत्यु भएको हो।
जिल्ला प्रहरी कार्यालय सप्तरीका प्रमुख एसपी ढकेन्द्र खतिवडाका अनुसार, डकैतहरूले लुटपाट गर्न खोज्दा प्रतिकार गरेपछि कान्तलाल चौधरीमाथि गोली प्रहार गरेका थिए । घटनास्थलमा एउटा गोलीको खोका र तीन वटा गोली बरामद भएको प्रहरीले जनाएको छ।
सोही घटनामा मृतक कान्तलालका भाइ ४० वर्षीय रामाकान्त चौधरी पनि गम्भीर घाइते भएका छन् । दाजुको बचाउमा खटिएका रामाकान्तमाथि डकैतहरूले धारिलो हतियारले प्रहार गरेका थिए । उनको लहानस्थित प्रादेशिक अस्पतालमा उपचार भइरहेको छ।
डकैतहरूले घरबाट करिब ५० देखि ६० हजार रुपैयाँ नगद, ५ तोला सुन र २ किलो चाँदीसहितका सरसामान लुटेर लगेको एसपी खतिवडाले बताए। प्रहरीले घटनाको सूक्ष्म अनुसन्धान गरिरहेको जनाएको छ।
