न्युज डेस्क / एचकेनेपाल डट कम –
हङकङ, २४ अगस्ट। “मेरो डान्स युनिभर्स सिजन २” को प्रतिष्ठित उपाधि हङकङकी रिस्ता गुरुङले जितेकी छिन्, त्यसैगरी “मेरो भ्वाइस युनिभर्स सिजन २” को उपाधि जापानका प्रथम गुरुङले हात पारेका छन्।
इन्ट्रा-नेशनल वेलफेयर एण्ड सपोर्टद्वारा शनिवार काठमाडौंमा आयोजित भव्य समारोहमा दुवै गुरुङविजेताले जनही एक करोड रुपैयाँको पुरस्कार हात पारे।
पोखरा घर भएकी रिस्ता गुरुङले हङकङबाट प्रतियोगितामा सहभागिता जनाएकी थिइन्। उनको आकर्षक र अद्वितीय नृत्य शैलीले निर्णायक र दर्शक दुवैलाई मन्त्रमुग्ध पारेको थियो। हङकङका नेपाली समुदायको भरपूर समर्थन पाएकी रिस्ताले कडा प्रतिस्पर्धामा अन्य प्रतिभाशाली प्रतिस्पर्धीहरूलाई पछाडि पार्दै यो गौरवशाली उपाधि जित्न सफल भइन्।
“मेरो भ्वाइस युनिभर्स सिजन २” मा हङकङका टोपराज तामाङले पनि उत्कृष्ट प्रदर्शन गरेका थिए। हङकङका नेपालीहरूबाट अत्यधिक मत र समर्थन पाएका टोपराज तामाङ प्रथम उपविजेता बन्दै २५ लाख रुपैयाँ पुरस्कार जित्न सफल भए।
इन्ट्रा-नेशनल वेलफेयर एण्ड सपोर्टका अध्यक्ष डिल्ली अधिकारीले भने, “यो प्रतियोगिताले विश्वभरका नेपाली प्रतिभाहरूलाई एक मञ्चमा ल्याएको छ। विजेताहरू र सबै प्रतिस्पर्धीहरूको उज्ज्वल भविष्यको कामना गर्दछौं।”
