विश्व नेताहरू चीनको विजय दिवस परेडमा, ट्रम्पको आलोचना

काठमाडौं । चीनले दोस्रो विश्वयुद्धको अन्त्यमा जापानको आत्मसमर्पणको ८०औँ वार्षिकोत्सव मनाउन बेइजिङमा भव्य विजय दिवस परेड आयोजना गरेको छ। परेडको सुरुवातसँगै अमेरिकी राष्ट्रपति डोनाल्ड ट्रम्पले सामाजिक सञ्जालमार्फत कडा प्रतिक्रिया दिएका छन्। उनले रुसी राष्ट्रपति भ्लादिमीर पुतिन र उत्तर कोरियाली नेता किम जोङ उनमाथि अमेरिकाविरुद्ध षड्यन्त्र गरेको आरोप लगाए।

ट्रम्पले आफ्नो ट्रुथ सोशल पोस्टमा लेखे, “चीनका राष्ट्रपति शी जिनपिङले अमेरिकाले चीनको स्वतन्त्रताका लागि दिएको समर्थन र बलिदानको कदर गर्नुपर्छ। धेरै अमेरिकीहरू चीनको विजयका लागि मरेका थिए।” उनले पुतिन र किमलाई ‘शुभकामना’ दिँदै उनीहरूले अमेरिकाविरुद्ध षड्यन्त्र गरिरहेको दाबी गरे।

चीनका राष्ट्रपति शी जिनपिङले परेडमा सम्बोधन गर्दै भने, “इतिहासले हामीलाई सिकाउँछ कि मानवता सँगै उभिन्छ र सँगै पतन हुन्छ। चीन कुनै पनि धम्कीबाट कहिल्यै डराउँदैन।” यो परेड चीनको हालसम्मकै सबैभन्दा ठूलो सैन्य प्रदर्शन हो, जसमा विश्वका विभिन्न नेताहरू सहभागी भएका थिए।

परेडअघि शी जिनपिङ, पुतिन र किम जोङ उन एकसाथ देखिए, जुन उनीहरूको पहिलो सार्वजनिक सँगै उपस्थिति हो। चीनले २६ देशका नेताहरूलाई निम्तो गरेको थियो, जसमा नेपालका प्रधानमन्त्री केपी शर्मा ओलीसहित पाकिस्तान, भियतनाम, मलेसिया, बेलारूस, इरान, जिम्बाब्वे, सर्बिया, स्लोभाकिया, क्युबा र म्यानमारलगायतका नेताहरू सहभागी थिए। (एजेन्जीहरुको सहयोगमा)