काठमाडौं, नयाँ बानेश्वरमा जेनजीको उग्र प्रदर्शनका क्रममा प्रहरीले चलाएको रबर गोली लागेर मृत्यु हुनेको संख्या १५ पुगेको छ। प्रहरीका एक उच्च अधिकृतका अनुसार मृत्यु हुनेहरूमा राष्ट्रिय ट्रमा सेन्टरमा ७ जना, सिभिल अस्पतालमा ३ जना, त्रिवि शिक्षण अस्पतालमा १ जना, सिनामंगलस्थित काठमाडौं मेडिकल कलेजमा २ जना र घटनास्थलमै २ जनाको मृत्यु भएको छ।
सिभिल अस्पतालका मेडिकल डाइरेक्टर डा. दिपक पौडेलले शरीरमा गोली लागेका एक युवाको उपचारका क्रममा मृत्यु भएको जानकारी दिए। उनले भने, “कम्तिमा ७० जना घाइते अस्पतालमा छन्, केहीको अवस्था चिन्ताजनक छ।” घाइतेहरूको सिभिल, एभरेस्टलगायत विभिन्न अस्पतालमा उपचार भइरहेको छ, तर घाइतेको यकिन संख्या अझै खुल्न बाँकी छ।
जेनजी प्रदर्शनकारीहरूले निषेधित क्षेत्र तोड्दै संघीय संसद् भवनभित्र प्रवेश गर्ने प्रयास गर्दा प्रहरीसँग झडप भएको थियो। प्रहरीले प्रदर्शन नियन्त्रण गर्न पानीको फोहरा, अश्रुग्यास र रबर गोली प्रयोग गरेको थियो। प्रदर्शनकारीहरूले संसद् भवनको गेटमा आगो लगाएपछि स्थिति थप जटिल बनेको हो।
जिल्ला प्रशासन कार्यालय काठमाडौंले बानेश्वर क्षेत्रमा दिउँसो १२:३० बजेदेखि राति १० बजेसम्म कर्फ्यू आदेश जारी गरेको छ। कर्फ्यू क्षेत्र नयाँ बानेश्वर चोकदेखि पश्चिम एभरेस्ट होटल हुँदै बिजुली बजारसम्म, पूर्वतर्फ मिन भवन, शान्तिनगर हुँदै तीनकुने चोकसम्म, उत्तरतर्फ आइप्लेक्स मल हुँदै रत्नराज्य माध्यमिक विद्यालयसम्म र दक्षिणतर्फ शंखमुल ओरालो हुँदै शंखमुल पुलसम्म तोकिएको छ।
जेनजी समूहले आन्दोलनमा घुसपैठ भएको दाबी गर्दै प्रदर्शनकारीहरूलाई सुरक्षित घर फर्कन आह्वान गरेको छ। यद्यपि, उनीहरूले आन्दोलनलाई निरन्तरता दिने अडान कायम राखेका छन्।
प्रशासनले कर्फ्यूको कडाइका साथ पालना गर्न र शान्ति कायम राख्न आग्रह गरेको छ। नयाँ बानेश्वर क्षेत्र अझै तनावग्रस्त छ भने प्रहरीले थप सुरक्षा बल परिचालन गरी स्थिति नियन्त्रणमा लिने प्रयास गरिरहेको छ।
