काठमाडौं, २४ भदौ २०८२ – पूर्वप्रधानमन्त्री तथा नेपाली कांग्रेसका सभापति शेरबहादुर देउवा र उनकी पत्नी परराष्ट्रमन्त्री आरजु राणा देउवामाथि उग्र प्रदर्शनकारी जेनजी समूहले कुटपिट गरेको छ। यो घटना काठमाडौंको बूढानिलकण्ठस्थित देउवाको निजी निवासमा भएको हो।
जेनजी आन्दोलनका क्रममा उग्र रूपमा प्रस्तुत भएका युवाहरूले देउवा दम्पतीमाथि आक्रमण गरेको बताइएको छ। प्रदर्शनकारीहरूले देउवाको घरमा तोडफोड र आगजनीसमेत गरेका छन्।
यो आन्दोलनले राजधानीमा तनावपूर्ण स्थिति सिर्जना गरेको छ। प्रदर्शनकारीहरूले सिंहदरबार, संसद् भवन र विभिन्न नेताहरूको घरमा आगजनी र तोडफोडका गतिविधिहरू जारी राखेका छन्। प्रहरीले स्थिति नियन्त्रण गर्न कडा सुरक्षा व्यवस्था गरेको छ, तर आन्दोलनकारीहरूको उग्र गतिविधिका कारण थप चुनौती खडा भएको छ।
