निरञ्जन राजवंशी –
काठमाडौं, यस पटकको एनएसजेएफ पल्सर स्पोर्ट्स अवार्डको २२औं संस्करण हुनेछ। यसअघिका संस्करणभन्दा यसपल्टको कार्यक्रम ठ्याक्कै एउटा कारणले फरक छ। यो हो, आयोजक सहरको रूपमा पोखरा। अहिलेसम्म जति पनि कार्यक्रम भए, ती काठमाडौंमै भए। अब भने कार्यक्रम केन्द्रीय राजधानीभन्दा बाहिर पुग्ने भएको छ। यस्तोमा प्रश्न हुन्छ, पोखरा नै किन त ? पोखरामा अवार्ड कार्यक्रम हुनुको अर्थ के हो त ? सम्भवतः यसको उत्तर भने सजिलो छ।
घरेलु खेलकुदको सबैभन्दा ठूलो प्रतियोगिता हो, राष्ट्रिय खेलकुद। यसको सुरुआत भएको थियो, २०३८ सालमा। त्यसयताको दोस्रो संस्करण २०४० मा पोखरामै भएको थियो। अहिले पनि राष्ट्रिय खेलकुदको इतिहास कोट्याउनुपर्दा चार दशकभन्दा बढी समयअघि पोखरामा भएको त्यो प्रतियोगिता खुसी र गर्वले सम्झनेहरू धेरै छन्। पोखरा नै २०७९ मा फेरि एकपटक नवौं राष्ट्रिय खेलकुद आयोजना भएको थियो।
त्यसो त यो राष्ट्रिय प्रतियोगिताको मूल आयोजक राष्ट्रिय खेलकुद परिषद् थियो, तर पोखरा त्यसको मुख्य आधारस्थल थियो। त्यस अर्थमा पोखरा नेपाली खेलकुदको केन्द्र हो, खेलको भाषामा भन्दा ‘स्पोर्ट्स हब’। पोखरासँग विशाल भौतिक संरचनाहरू रहेका छन्। यत्तिको संरचना अन्यत्र पाइन्न भन्दा नै हुन्छ। अझ केही खेल पोखरामै मात्र हुन सक्ने स्थिति समेत छ। जस्तो केही साहसिक खेलहरू। त्यसमा सबैभन्दा अगाडि आउने नाम त ट्रायथलन र प्याराग्लाइडिङ नै हो।
पोखराले केही असाध्यै नाम चलेका खेलाडी पनि जन्माएको छ। तिनीहरूले राष्ट्रिय तथा अन्तर्राष्ट्रिय प्रतियोगितामा उच्च प्रदर्शन गरेका छन्। यस्ता खेलाडीको उत्पादनमा सहयोग पुराइरहेको छ विभिन्न राष्ट्रिय तथा अन्तर्राष्ट्रिय प्रतियोगिता र यस्तै खालका स्पोर्ट्स अवार्ड कार्यक्रमले।
विगतदेखि स्पोर्ट्स अवार्ड गर्दै आएको संस्था नेपाल खेलकुद पत्रकार मञ्च पनि हो। छोटकरीमा एनएसजेएफ। नेपाली खेलकुद पत्रकारको छाता संगठन मञ्चको नेपाली खेलकुदको सबैभन्दा ठूलो जिम्मेवारी भन्नु नै यो अवार्ड कार्यक्रमको आयोजना गर्नु हो। मञ्चको के मान्यता रहेको छ भने यो अवार्ड कार्यक्रम अब काठमाडौंमै मात्र सीमित हुँदैन। कार्यक्रम मोफसलमा हुने हो भने यो अवार्डको महत्व अझ बढ्नेछ। मञ्चको खास उद्देश्य त क्रमशः यो अवार्ड कार्यक्रमलाई सातै प्रदेशमा गर्ने रहेको छ, यसकै पहिलो खुड्किलो हो, पोखरा।
मञ्चको के पनि तर्क रहेको छ भने यो अवार्ड कार्यक्रम मोफसलमा पुगेपछि यसले एकातर्फ नेपाली खेलकुदको महत्व नजानिँदो तरिकाले बढ्ने छ नै, अर्कोतर्फ आम खेलाडीलाई स्टार हुनुको महत्व पनि थाहा हुनेछ। अहिलेसम्म जतिले यो अवार्ड जितेका छन्, त्यसमध्ये सबैको भनाइमा एउटा समानता पाइन्छ र यो हो, स्टार हुनुको अनुभव। मोफसलमा अवार्ड कार्यक्रम हुँदा त्यस क्षेत्रका खेलाडीले स्टारडम महसुस गर्नेछन् र यसैकै लागि उत्कृष्ट प्रदर्शन गर्न प्रेरित हुनेछन्।
नेपाल खेलकुद पत्रकार मञ्च, गण्डकीले हरेक वर्ष पोखरा स्पोर्ट्स अवार्ड गर्दै आइरहेको अवस्थामा यसपल्ट केन्द्रले गर्ने अवार्ड कार्यक्रम पहिलो पटक राजधानी बाहिर पोखरामा ल्याउनुमा महत्वपूर्ण भूमिका खेल्नेमा पर्छन्, पोखरा महानगरपालिकाका मेयर धनराज आचार्य। उनी आफैं नेपाली खेलकुदलाई मन पराउने व्यक्ति हुन्। उनकै शब्दमा भन्ने हो भने पोखरामा अहिलेसम्म धेरै खाले गतिविधि भएका छन्।
खेलकुदका ठूल्ठूला प्रतियोगिता भए, त्यसमा १३औं दक्षिण एसियाली खेलकुद पनि पर्छ। अनि उत्तिकै संख्यामा साहित्य महोत्सव तथा अन्तर्राष्ट्रिय प्रतियोगिताहरू हुँदै आइरहेका छन्। साथै नेपाल खेलकुद पत्रकार मञ्च गण्डकीको आयोजनामा निरन्तर हुने पोखरा स्पोर्ट्स अवार्डको १०औं संस्करण पनि वैशाखमा हुँदैछ।
