पशन तमू र जगतअम्बु गुरुङ / एचकेनेपाल डट कम –
हङकङ, ७ अगष्ट । हङकङ अल्ट्रा–ट्रेल रनिङ एसोसिएसनको आयोजनामा बिहीबार हङकङमा ब्रोड पिक हिमपहिरोमा परी ज्यान गुमाएका आरोहीहरूप्रति श्रद्धाञ्जली अर्पण गरिएको छ।
हिमपहिरोमा परी ज्यान गुमाएका आरोहीहरूको आत्माको चिरशान्तिको कामना गर्दै यो सभा आयोजना गरिएको हो।
गत ३० जुलाई २०२६ मा पाकिस्तानको ब्रोड पिकमा गएको विनाशकारी हिमपहिरोमा विश्वविख्यात आरोही निर्मल पुर्जा (निम्स दाइ) सहित १० जनाको ज्यान गएको थियो।
५ जना अन्य नेपाली आरोहीहरू पुर बहादुर गुरुङ (युक्ता), किली पेम्बा शेर्पा, निमा शेर्पा, नवाङ थिन्दु शेर्पा र ग्यालु शेर्पा र विदेशी ४ जना आरोहीहरू ओमानकी नाधिरा अहमद अब्दुल्लाह अल हार्थी, अमेरिकाकी म्यालोरी गेस, पाकिस्तानका सोहेल साखी र चीनका वाङ जोङ गरी १० जना आरोहीहरूको ज्यान गएको थियो।
कार्यक्रममा सहभागीहरूले मैनबत्ती प्रज्वलन गरेर दिवंगत आत्माहरूप्रति श्रद्धाञ्जली अर्पण गरे।
हङकङ किराँत याक्थुङ चुम्लुङ हलमा आयोजित कार्यक्रममा कार्यवाहक महावाणिज्यदूत सतिश गुरुङ प्रमुख अतिथि थिए। गुरुङले ब्रोड पिक आरोहणका क्रममा ज्यान गुमाएका नेपाली आरोहीप्रति भावपूर्ण श्रद्धाञ्जली व्यक्त गरे।
कार्यक्रममा अन्य अतिथिहरूको रूपमा अरुणा गुरुङ, राज गुरुङ, अनु राई (एनआरएनए एचके) र गोकर्ण ढकाल उपस्थित थिए। सतिश गुरुङ र राजकुमार राईले श्रद्धाञ्जली व्यक्त गरेका थिए।
यसैगरी, सुष्मा गुरुङले स्वागत मन्तव्य राखेको उक्त कार्यक्रमको अध्यक्षता बेदराज लिम्बूले गरेका थिए।
