बागलुङ । अविरल वर्षासँगै गएको विनाशकारी बाढी र पहिरोका कारण बागलुङका विभिन्न स्थानमा ठूलो मानवीय क्षति भएको छ।
पछिल्लो समय प्राप्त विवरण अनुसार पहिरोमा पुरिएर मृत्यु हुनेहरूको सङ्ख्या १२ पुगेको छ भने एक जना अझै बेपत्ता रहेका छन्।
विगत केही दिनदेखि लगातार परिरहेको मुसलधारे झरीका कारण जिल्लाका ग्रामीण क्षेत्रहरूको जनजीवन पूर्ण रूपमा अस्तव्यस्त बनेको छ। पहिरोले विशेष गरी जिल्लाको तमानखोला, निसीखोला र ताराखोला गाउँपालिकालाई सबैभन्दा बढी प्रभावित पारेको छ।
जिल्ला प्रहरी कार्यालय बागलुङका अनुसार निसीखोला गाउँपालिका वडा नम्बर ३ मा पहिरोले घर पुरिँदा एकै परिवारका चार जनाको मृत्यु भएको छ। मृत्यु हुनेहरूमा ३६ वर्षीया श्यामकुमारी विक, उनका १३ वर्षीय छोरा मनोज विक, ८ वर्षीय छोरा मुकेश विक र ३ वर्षीय छोरा निशान विक रहेका छन्। यसैगरी, निसीखोला गाउँपालिका वडा नम्बर ६ शेलवाङमा पहिरोले गोठ पुरिँदा ५० वर्षीय सूर्यबहादुर घर्तीको ज्यान गएको छ।
तमानखोला गाउँपालिकामा पनि पहिरोले ठूलो क्षति पुर्याएको छ। तमानखोला गाउँपालिका वडा नम्बर ३ धनरासकमा पहिरोले घर बगाउँदा ८० वर्षीय बुद्धीराज घर्ती र ६६ वर्षीया भीमदेवी घर्तीको मृत्यु भएको छ। त्यस्तै, वडा नम्बर ४ सन्तारमा घर पुरिँदा ५० वर्षीय हस्तवीर श्रीपाली र ६५ वर्षीया उदिमशरा श्रीपालीको ज्यान गएको छ। सोही घटनामा हस्तवीरकी पत्नी ५२ वर्षीया पुनसरा विक हालसम्म बेपत्ता छिन् र उनको खोजी कार्य जारी छ।
यता ताराखोला गाउँपालिका वडा नम्बर ५ धस्मारमा घर पुरिएर ५९ वर्षीय मानबहादुर रोकाको मृत्यु भएको छ। सोही गाउँपालिकाको वडा नम्बर ५ शिपमा पहिरोले घर पुरिँदा थप दुई जनाको मृत्यु भएको छ। मृत्यु हुनेमा ५५ वर्षीय दिलबहादुर पुन र म्याग्दी जिल्ला मालिका गाउँपालिका वडा नम्बर २ स्थायी घर भई त्यहाँ बस्दै आएकी उनकी सासू ७牢 वर्षीया नरमाया रोका रहेका छन्।
