नातिबाबु भट्ट / एचकेनेपाल डट कम –
कोलोराडो, अमेरिका। नेपाली सांस्कृतिक केन्द्र नेपाली घरको सहयोगार्थ कोलोराडोमा खेलिएको देउसी–भैलोबाट २८ हजार डलरभन्दा बढी सहयोग संकलन गरिएको छ।
नेपाली घरको आयोजनामा नोभेम्बर ७ तारिख साँझ वेस्टमिन्स्टरस्थित नेपाली सांस्कृतिक केन्द्र नेपाली घरमा खेलिएको देउसी–भैलोमा १५ हजार ५ सय ७० र अरोरा तथा सेन्टिनियलवासी नेपाली समुदायको आयोजनामा अरोरास्थित Falcon Creek Middle School मा १३ हजार ५५ डलर गरी जम्मा २८ हजार ६ सय २५ डलर सहयोग संकलन गरिएको हो।
सांस्कृतिक केन्द्र नेपाली घरमा खेलिएको देउसी–भैलोको उद्घाटन सविता श्रेष्ठ र अरोरामा आयोजित देउसी–भैलोको कान्ता रेग्मीद्वारा पानसमा बत्ती बालेर उद्घाटन गरिएको थियो । नेपाली राष्ट्रियगानसँगै अगाडि बढाइएको कार्यक्रम साँझ ५ बजेदेखि राति ९ बजेसम्म सञ्चालन भएको थियो।
आफ्नो स्थापना कालदेखि नै देउसी भैलो खेल्दै आएको नेपाली घरले कार्यक्रमलाई भव्य र सभ्यरूपमा सफल बनाउन सांस्कृतिक सचिव दिनेश कार्कीलाई संयोजनको जिम्मा दिएको थियो भने, अरोराको कार्यक्रम सफलताका साथ सम्पन्न बनाउन नेपाली घरका कोषाध्यक्ष राजन सापकोटाले संयोजनको जिम्मा लिएका थिए।
कोलोराडोमा रहेका नेपाली भाषी समुदायको बाक्लो उपस्थिति रहेको कार्यक्रममा विशेषगरी साना बालबालिकाहरूको व्यापक सहभागिता र सक्रियता बीच कार्यक्रम सम्पन्न हुनु सराहनीय पक्ष रहेको छ । दुवै कार्यक्रममा बालबालिकाहरूले तिहार सम्बन्धी गीतमा सुन्दर नृत्य प्रस्तुत गरेका थिए भने केहीले गीत गाएर आफ्नो कला प्रस्तुत गरेका थिए । त्यसैगरी कार्यक्रममा गायिका सम्झना पाण्डे, निलम श्रेष्ठ, उत्तरा श्रेष्ठ, दिनेश कार्की लगायतले सुन्दर गीत गाएर श्रोता दर्शकको मन जित्न सफल भएका थिए । कार्यक्रममा नेपाली भाषी भुटनिज समुदायको पनि उल्लेख्य सहभागिता र सहयोग रहेको थियो।
यसैगरी दुवै कार्यक्रममा परम्परागत शैलीमा देउसी भैलो खेलिएको थियो । कार्यक्रम सफल बनाउन सिस्टर ग्रुप दिदीबहिनी समूह कोलोराडो लगायतका संघ संस्थाहरूको सक्रिय सहभागिता रहेको थियो।
यसैबीच नेपाली घरका अध्यक्ष गंगा चौलागाईंले सामाजिक सञ्जाल मार्फत देउसी भैलोमा सहभागी सबैलाई धन्यवाद दिएका छन् । उनले भनेका छन्, नेपाली घरद्वारा आयोजित देउसी–भैलो कार्यक्रममा आफ्नो अमूल्य समय प्रदान गरी उत्साहजनक सहभागिता जनाउनुहुने सम्पूर्ण सहयोगी दाताहरू, स्वयंसेवकहरू, कलाकारहरू, सहभागीहरू, शुभेच्छुकहरू तथा उपस्थित सम्पूर्ण महानुभावहरूप्रति म आफ्नो व्यक्तिगत तर्फबाट तथा नेपाली घर परिवारको तर्फबाट हृदयदेखि नै हार्दिक धन्यवाद तथा कृतज्ञता व्यक्त गर्दछु। यहाँहरूको उत्साहपूर्ण सहभागिता, सहयोग, सद्भाव र आत्मीयताले कार्यक्रमलाई केवल एउटा सांस्कृतिक उत्सवमा मात्र सीमित नराखी आपसी प्रेम, सद्भाव, एकता र नेपालीपनको सुन्दर संगमका रूपमा स्थापित गरेको छ। देउसी–भैलो हाम्रो मौलिक संस्कृति, परम्परा र पहिचानको अमूल्य धरोहर हो। विदेशको व्यस्त जीवनशैलीका बीच पनि आफ्नो भाषा, कला, संस्कृति र परम्परालाई जीवन्त राख्दै भावी पुस्तासम्म हस्तान्तरण गर्ने यस अभियानमा यहाँहरू सबैको सहभागिता अत्यन्तै प्रशंसनीय र प्रेरणादायी छ।
नेपाली घरप्रतिको यहाँहरूको लगन, मेहनत, समर्पण र नेपाली समाजप्रतिको निःस्वार्थ सेवाभाव सधैँ यसरी नै कायम रहिरहोस् भन्ने हार्दिक शुभकामना व्यक्त गर्दछु। यहाँहरूजस्ता समर्पित, सहयोगी र समाजप्रति जिम्मेवार साथीहरूसँग हातेमालो गर्दै काम गर्न पाउनु मेरा लागि पनि गौरवको विषय हो। कुनै पनि कार्यक्रम वा संस्था एक्लो प्रयासले सफल हुँदैन।
यसको सफलताको पछाडि धेरै हातहरूको मेहनत, धेरै मनहरूको भावना र धेरै व्यक्तिहरूको निःस्वार्थ योगदान जोडिएको हुन्छ। त्यसैले कार्यक्रमको तयारीदेखि व्यवस्थापन, सांस्कृतिक प्रस्तुति, आर्थिक तथा भौतिक सहयोग र प्रत्यक्ष सहभागितासम्म योगदान पुर्याउनुहुने प्रत्येक व्यक्तिको योगदान हाम्रा लागि उत्तिकै महत्वपूर्ण र सम्मानयोग्य छ। हामी सबैको एकता, सहकार्य र सामूहिक प्रयासले नेपाली सांस्कृतिक केन्द्र घरलाई अझ उचाइमा पुर्याउँदै नेपाली भाषा, संस्कृति, परम्परा र पहिचानको संरक्षण तथा प्रवर्द्धन गर्ने साझा अभियानलाई अझ सशक्त बनाउनेछ भन्ने पूर्ण विश्वास लिएको छु भनेका छन्।
त्यसैगरी नेपाली सांस्कृतिक केन्द्र नेपाली घरमा खेलिएको देउसी–भैलोका संयोजक दिनेश कार्कीले पनि सामाजिक सञ्जाल मार्फत देउसी भैलोलाई सफलताका साथ सम्पन्न बनाउन सहयोग गर्नुहुने सबैलाई धन्यवाद दिएका छन् । आयोजकहरूले संकलित सहयोगबाट खर्च कटाई बाँकी रहेको रकम नेपाली घरको खातामा जम्मा गरिने जनाएका छन्।
