बाइडेनसामु समस्याको भारी

अमेरिका, जोए बाइडेन अमेरिकाको राष्ट्रपतिमा निर्वाचित भएपछि विश्वभर विभिन्न प्रतिक्रिया उत्पन्न भएका छन्।

अमेरिकी जनताको सर्वाधिक ठूलो प्रतिक्रिया भने यस्तो छ– ‘यो निर्वाचनमा बाइडेन निर्वाचित भएका होइनन्, राष्ट्रपति ट्रम्प हारेका हुन्।’

एउटाको हारमा अर्काको जित त हुन्छ नै। यसलाई जे जसरी अर्थ्याए पनि सही नै लाग्छ तर सामान्यतः दोस्रो कार्यकालमा पराजय भोग्ने थोरै अभागी राष्ट्रपतिको सूचीमा ट्रम्पको नाम पनि समावेश भएको छ । अमेरिका विश्वको पहरेदार सिपाही भएका कारण बाइडेनले राष्ट्रपतिको पदभार ग्रहण गरेपछि (जनवरी २०) देशभित्र र देश बाहिरका अनगिन्ती समस्यासँग जुध्नुपर्ने छ।

अमेरिकी मूल्य र मान्यतामाथि धावा बोलिएको ट्रम्प कार्यकालको समीक्षा गर्र्दै यसको पुनरुत्थान वा वापसीमा विशेष जोड दिनुपर्नेछ । स्वतन्त्रता र न्यायको आदर्श परिभाषा स्थापित गर्नुपर्ने छ। भत्किएका जनविश्वास पुनः जागृत गर्नुपर्नेछ । देशभित्रको अहिलेको सबैभन्दा जल्दोबल्दो समस्या भनेको कोरोना भाइरसको आतङ्क नै हो। यसले करिब दुई लाख ३४ हजार अमेरिकी नागरिकको ज्यान लिइसकेको गोरखापत्र दैनिकमा खवर छ।