हङकङकी डिस्ट्रिक्ट काउन्सिलरद्वारा अफिसमै आत्महत्या..

एचकेनेपाल डट कम –

हङकङ, १ मे । हङकङकी एक महिला डिस्ट्रिक्ट काउन्सिलरले आफ्नै कार्यालयमा आइतवार दिउंसो आत्महत्या गरेकी छन्।

पेङ चाउ र हे लिङ चाउ जिल्ला काउन्सिलर जोसेफिन साङले कोइला जलाएर आत्महत्या गरेको स्थानीय मिडियाले जनाएको छ।

दिउँसो १ः२३ बजे पेङ चाउको ५८ विङ अन स्ट्रिटको भुईं तलामा रहेको कार्यालयमा एक महिला कोइला जलाएर बेहोस भएको खबर प्रहरीलाई प्राप्त भएको थियो।

फायर सर्भिस विभागले कार्यालयको ढोका फोडेर भित्र पस्दा उनी मृत फेला परेकी हुन्। मृतक पेङ चाउ र हे लिङ चाउ टापुका जिल्ला परिषदका सदस्य जोसेफिन साङ साउ-हो रहेको खुलेको छ।

प्रहरीले घटनाबारे अनुसन्धान गरिरहेको जनाएको छ।

सेक्युरिटी म्यानेजरको रुपमा काम गर्ने साङ सामुदायिक मामिला, संस्कृति तथा मनोरञ्जन समिति, जिल्ला सुविधा व्यवस्थापन समिति र ट्राफिक तथा यातायात समितिलगायत विभिन्न जिल्ला परिषद् समितिका सदस्य थिइन्। उनी पर्यटन, कृषि, मत्स्यपालन, वातावरणीय सरसफाई तथा जलवायु परिवर्तन समितिको उपाध्यक्ष समेत थिइन्।