चीनले नेपाली सेनालाई दियो घुम्ती अस्पताल…

धुलिखेल, चीन सरकारले भूकम्पबाट घाइते भएका नेपालीको तत्काल उपचार गर्न काभ्रेमा सञ्चालन गरेको घुम्ती अस्पताल शुक्रबार नेपाली सेनालाई हस्तान्तरण गरेको छ।

धुलिखेलस्थित घुम्ती अस्पतालमा भूकम्पका घाइतको उपचार गर्दै चिनियाँ डाक्टरको टोली। तस्बिर: एजेन्सी

चिनियाँ सहायक विदेशमन्त्री लियु जियानचाओको नेपाल भ्रमणको अवसर पारेर चीनले उक्त अस्पताल नेपाली सेनालाई हस्तान्तरण गरेको हो।

अस्पतालसँगै नेपाली सेनाले शल्यक्रिया उपकरण, अल्ट्रासाउन्ड, एक्स–रे, प्रयोगशाला तथा इसिजीजस्ता उपकरण र औजार प्राप्त गरेको छ।

सहायक विदेशमन्त्री लियु र नेपाली सेनाका बलाधिकृतरथी प्रदीपविक्रम राणाको उपस्थितिमा उक्त अस्पताल हस्तान्तरणसम्बन्धी कागजातमा हस्ताक्षर भएको थियो। नेपालमा गत वैशाख १२ को भूकम्पपछि चिनियाँ उपचार टोली वैशाख १४ गते यहाँ आइपुगेको थियो।

धुलिखेल अस्पतालसँग सहकार्य गरेर चिनियाँ चिकित्सक टोलीले खासगरी काभ्रेपलाञ्चोक, सिन्धुपाल्चोक र दोलाखाका बिरामीलाई सेवा पुर्याएको थियो। चिनियाँ टोलीले त्यस क्षेत्रमा बिरामीको उपचारका साथै पानीको मुहान सरसफाइ र पानी प्रशोधन गरेर स्थानीयवासीको मन जित्ने प्रयास गरेका थिए।

त्यस क्रममा भूकम्पमा परेर घाइते भएका ३०१ बिरामीलाई चिनियाँ घुम्ती अस्पतालमा भर्ना गरेरै उपचार गरिएको चिनियाँ चिकित्सक टोलीका संयोजक लियु केजिङले बताए। सो टोलीमा विशेषज्ञसहित ६० जना सहभागी थिए।

हस्तान्तरण समारोहलाई सम्बोधन गर्दै नेपाली सेनाका उपरथी डा किशोरजङ्ग राणाले भूकम्पमा प्रभावित क्षेत्रमध्ये पूर्वी क्षेत्रका बिरामीको उपचारमा चिनियाँ उपचार टोलीलाई खटाइएकामा धुलिखेल अस्पतालसँग सहकार्य गरेर चिनियाँ टोलीले उत्कृष्ट ढङ्गबाट उपचार सेवा प्रदान गरेको भनी सराहना गरे।

नेपालका लागि चिनियाँ राजदूत वु चुन्ताइले भूकम्पमा परी घाइते नेपाली नागरिकलाई उपचारमा सहयोग पुर्याउन खटिएको चिनियाँ टोलीले प्रभावकारी रुपमा कार्यसम्पादन गरेको बताए। (रासस)