तमुवान र मगरात आन्दोलनलाई मोर्चाबन्दी गर्ने

हुम तमु / एचकेनेपाल डट कम –
पोखरा, २३ कात्तिक। पहिचानसहितको संघीयता, संघीयतासहितको अधिकार सुनिश्चित गराउन तमुवान र मगरात संघर्ष समितिले आन्दोलनलाई मोर्चाबन्दी गर्ने भएको छ।

तमुवान संयुक्त संघर्ष समितिको आयोजनामा मंगलवार पोखरास्थित नेपाल मगर संघमा सम्पन्न तमुवान र मगरात आन्दोलनको अगुवा तथा सामाजिक संघ संस्थाको अगुवाहरुको भेलाले विगतदेखि विभेदमा पारिदै आएको आदिवासी भुमिपुत्र जनजातिहरुको माग पुरा गराउन तमुवान र मगरातको आन्दोलनलाई मोर्चाबन्दी गर्नुपर्ने निष्कर्ष निकालेको हो।

भेलामा सहभागीहरुले आन्दोलनका कार्यक्रमहरु तय गर्न तमुवान संयुक्त संघर्ष समिति र मगरात संघर्ष समितिको बैठकले आन्दोलनको कार्यक्रम र मिति तय गर्नुपर्नेमा जोड दिएका थिए । आन्दोलनको कार्यक्रम अन्र्तगत देशैभरको अधिकार र पहिचानका आन्दोलनहरुलाई मोर्चाबन्दी गर्दै राष्ट्रिय जनआन्दोलन गर्नुपर्न, प्रदेश स्तरीय प्रर्दशन, जिल्लास्तरीय र विभिन्न संस्थागत कार्यक्रम गर्न सुझाव दिएको छ । एकतावद्ध सशक्त आन्दोलन विना तमुवान, मगरातसहितको अधिकार, पहिचान प्राप्त नहुने उनीहरुको तर्फ थियो । तमुवान संयुक्त संघर्ष समिति, मगरात संघर्ष समिति र विभिन्न समाजका १३ जना अगुवाहरु आफ्ना आन्दोलनको विविध पक्षका बारेमा विचार व्यक्त गर्नुभएको थियो।

कार्यक्रममा तमुवान संयुक्त संघर्ष समितिका संयोजक हुमबहादुर गुरुङ तमुवान आन्दोलनको गतिविधी, आगमी कार्यक्रम र मोर्चागत आन्दोलनको अवधारणागत र मगरात संघर्ष समितिका संयोजक तथा नेपाल मगर संघको केन्द्रीय अध्यक्ष महेन्द्र थापा मगरले मगरात आन्दोलनको गतिविधी, आगमी कार्यक्रम र मोर्चागत आन्दोलनको अवधारणागत मन्तव्य व्यक्त गर्नुभएको थियो।

तमुवान संयुक्त संघर्ष समितिका अध्यक्ष हुमबहादुर गुरुङको अध्यक्षतामा भएको कार्यक्रमको संचालन सचिव गजेन्द्र लिम्बुले गर्नुभएको थियो।