हङकङको निर्माण स्थलमा फेरि अर्को एक कामदारको मृत्यु..

न्युज डेस्क / एचकेनेपाल डट कम –
हङकङ, ९ नोभेम्बर। केही दिनयता हङकङको निर्माण स्थलमा भएका दुर्घटनाहरुमा कामदारहरुको मृत्यु हुने क्रम बढेको छ। वितेका केही महिनाभित्र नेपाली एक कामदारको मृत्यु हुनुका साथै स्थानीय कामदारहरुको निर्माण स्थलमा काम गर्ने क्रममा दुर्घटनामा परेर मृत्यु भएको हो। आज पनि ताइवाईको पाक आओ चोङ निर्माण स्थलमा भएको दुर्घटनामा एक जना कामदारको मृत्यु भएको छ।

दिउँसो १:२७ बजे, ४१ वर्षीय चेन थरका कामदार झुण्डिएको लिफ्टमा काम गर्दै गर्दा अचानक लिफ्ट खसेर उनको कम्मर फलामे फ्रेममा च्यापिएको थियो।

दमकल विभागले उनलाई तत्काल उद्धार गरी शा टिनको प्रिन्स अफ वेल्स अस्पतालमा उपचारका लागि लगिएको थियो। तर दुर्भाग्यवश, अपराह्न २:२५ बजे उनको मृत्यु भयो। प्रहरीले यस घटनालाई ‘औद्योगिक दुर्घटना’ को रूपमा वर्गीकरण गरेको छ र दुर्घटनाको कारण अनुसन्धान गरिरहेको छ।

मृतकका भाइले जानकारी दिए अनुसार, उनका दाजु हङकङका स्थायी बासिन्दा थिए र विवाहित थिए। उनकी श्रीमती र ६ र १३ वर्षका बच्चाहरू मुख्य भूमि चीनमा छन्। मृतक सिमेन्ट र पानी लोड गर्ने काममा संलग्न थिए र करिब ६ महिनादेखि यस निर्माण स्थलमा काम गर्दै आएका थिए।

औद्योगिक दुर्घटना पीडित अधिकार संघकी महानिर्देशक सियाओ छियानवेनका अनुसार, घटना १२ औं तल्लामा भएको थियो। मृतक सामान ओसार्ने लिफ्टबाट निर्माण सामग्री झिक्दै गर्दा अचानक लिफ्ट चल्न थाल्यो र उनको कम्मर लिफ्ट र भित्ताको बीचमा च्यापियो।

यो दुर्घटना शा टिनको ताइवाई स्टेशन माथिको पाक आओ चोङ ३ (ब्लक १ र ८) परियोजना स्थलमा भएको हो, जुन न्यू वर्ल्ड र एमटीआर कम्पनीहरूद्वारा संयुक्त रूपमा विकास गरिँदैछ। यस परियोजनाको पूरा हुने अनुमानित मिति मार्च ३१, २०२५ रहेको छ।

श्रम विभागले घटनाको जानकारी पाएपछि तत्काल आफ्ना कर्मचारीहरूलाई घटनास्थलमा पठाएको र दुर्घटनाको कारणबारे गहन अनुसन्धान सुरु गरेको जनाएको छ।