बेलायतका लागि नवनियुक्त राजदूत घिमिरेलाई बधाई तथा शुभकामना..

एचकेनेपाल डट कम –
काठमाडौं, संयुक्त अधिराज्य बेलायतका लागि नियुक्त राजदूत चन्द्र घिमिरेलाई काठमाडौंमा एक विशेष समारोहको आयोजना गरी सम्मान गरिएको छ। धरान सरोकार समाज नामक धरानेहरूको संस्थाले आयोजना गरेको यस कार्यक्रममा राजदूत घिमिरेलाई हार्दिक बधाई तथा शुभकामना प्रदान गरियो।

पूर्व राजदूत राजेश्वर आचार्यले आफ्नो अनुभवका साथै गर्नुपर्ने कामको बारेमा सल्लाह दिनुभएको थियो। उहाँले चीनमा आफू राजदूत भएर काम गर्दा दुई देशका सम्बन्धलाई प्रगाढ बनाउँदै राष्ट्रको हितका लागि गरेका कामहरूको बारेमा चर्चा गर्नुभएको थियो।

उहाँले अब काम गर्दा राजदूत नभई राष्ट्रदूत भएर काम गर्न सुझाव दिनुभयो। त्यस्तै आफूले कालापानीको विवादको बेलामा सहजीकरण गरेको स्मरण गर्दै बेलायतमा त्यो बेलाको कागजात वा नक्साको लागि प्रयास गर्न पनि सुझाउनुभएको थियो।

कार्यक्रममा च्याम्बर अफ कमर्शका पूर्व अध्यक्ष महेश कुमार अग्रवालले बेलायतले हाम्रो छिमेकी भारतमा राज गरेको विगत छ, जसको हामीसँग पुरानो सम्बन्ध रहेको पनि छ, त्यस्तो देशमा जान लाग्नु भएकोमा शुभकामना व्यक्त गर्नु भयो।

पूर्व मन्त्री कृष्णकुमार राईले घिमिरेलाई आफूलाई सिफारिस गर्ने दल, समूह, समुदाय आदिका लागि मात्र नभई सम्पूर्ण नेपालको प्रतिनिधित्व गरी काम गर्न शुभकामना दिनुभयो। उहाँले त्यसो गर्न सके हामी अझ बढी गौरवान्वित हुने बताउनुभयो।

कार्यक्रममा क्याप्टेन नारायण राई, नेपाल बाल संगठनकी अध्यक्ष विद्या न्यौपाने, वरिष्ठ अधिवक्ता हरिहर दाहाल, भुपेन्द्र कार्की, नारायण श्रेष्ठ आदिले बधाई र शुभकामना व्यक्त गर्नुभएको थियो।

धरान सरोकार समाजका सदस्य एवम् पूर्व एआईजी सन्दीप भण्डारीले स्वागत मन्तव्य राख्नु भएको थियो। कार्यक्रममा बोल्दै नवनियुक्त राजदूत चन्द्र घिमिरेले आएका सुझावहरूलाई आफूले मनन गर्ने बताउँदै राष्ट्रको अधिकतम हितका लागि काम गर्ने बताउनु भयो। यसअघि मन्त्रालयमा हुँदा वा महावाणिज्य दूतका रूपमा काम गर्दाका अनुभवहरूलाई राजदूतका रूपमा उपयोग गर्ने बताउनु भयो।

कार्यक्रममा उहाँ भावुक हुँदै काठमाण्डौमा रहेका धरानेहरु विभाजित भएकोमा चिन्ता व्यक्त गर्दै एकीकृत हुन अनुरोध गर्नु भयो । कार्यक्रममा बोल्ने सबैले काठमाण्डौका सबै धरानेहरु धरान सरोकार समाजकै छातामुनि एकताबद्ध हुन सुझाव दिनु भयो ।

धरान सरोकार समाजका कार्यवाहक अध्यक्ष डा. महेन्द्र सुब्बाले आफ्नो संस्थाको अध्यक्ष राजदूतका रुपमा नियुक्त हुनुले आफ्नो संस्था मात्र नभई सम्पूर्ण धरानेहरु नै गौरवान्वित भएको बताउनु भयो । उहाँले सहभागी सबैलाई धन्यवाद ज्ञापन गर्नु भएको थियो । कार्यक्रम धरान सरोकार समाजका महासचिव राजेन्द्र रिमालले सञ्चालन गरेका थिए ।