चाई वानमा आगलागीमा परेर एक पुरुषको मृत्यु, महिला घाइते..

न्युज डेस्क / एचकेनेपाल डट कम –
हङकङ, २४ नोभेम्बर। चाई वानमा एक आवासीय युनिटमा आज आगलागी भएको छ। दुई जना घाइतेलाई अस्पताल लगिएकोमा एक जनाको मृत्यु भएको छ।

आज बिहान ११:३८ बजे चाई वान रोड २३३ स्थित सान सुई गार्डेनको ब्लक १ को एक युनिटमा आगलागी भएको छ। सुरक्षा गार्डले युनिटबाट धुवाँ निस्किएको देखेपछि सहयोगको लागि घटनाको जानकारी गराएका थिए। दमकल र एम्बुलेन्स टोलीहरू तत्काल घटनास्थलमा पुगेर आगो नियन्त्रणमा लिएका थिए।

स्थानीय मिडियाका अनुसार, अधिकारीहरूले युनिटको शौचालयबाट ६० वर्षीय एक बेहोस पुरुषलाई उद्धार गरेका थिए भने युनिटबाहिर ३० वर्षीया एक महिला धुवाँको कारण श्वासप्रश्वासमा समस्या भएर सचेत अवस्थामा सहयोगको प्रतीक्षा गरिरहेकी थिइन्।

दुवैलाई एम्बुलेन्समार्फत ईष्टर्न डिस्ट्रिक अस्पतालमा उपचारको लागि लगिएको थियो। तर बेहोस अवस्थामा रहेका पुरुषको पछि मृत्यु भएको पुष्टि भएको छ। घटनाको अनुसन्धानको भईरहेको प्रहरीले जनाएको छ।