काठमाडौं, २०८१ माघ १७ – नइ प्रकाशनले बालबालिकाहरूको विशेष प्रतिभा र समर्पणलाई सम्मान गर्दै आफ्नो वार्षिक पुरस्कार कार्यक्रम घोषणा गरेको छ। यस वर्ष ३ देखि १५ वर्ष उमेर समूहका नौ जना प्रतिभाशाली बालबालिकाहरूलाई २०८० सालको प्रतिष्ठित ‘नइ देरुनीखपू पुरस्कार’ प्रदान गरिने भएको छ।
उत्कृष्ट प्रतिभाहरूमा बहुआयामिक क्षेत्रमा कुशाग्र भट्टराई, साहित्यमा प्रतिष्ठा केसी, चित्रकलामा श्रीया गुरुङ, सङ्गीतमा सानवी यादव, नृत्यमा अनिका महर्जन र खेलकुदमा सुप्रिया ऐर रहेका छन्। प्रत्येक विजेताले ताम्रपत्रसहित दस हजार रूपियाँको पुरस्कार राशि प्राप्त गर्नेछन्।
विशेष उपलब्धिको रूपमा, नइ कोपिला पुरस्कारअन्तर्गत गायनमा काव्या शिवाकोटी र नृत्यमा सुधा तामाङलाई सात हजार रूपियाँको पुरस्कार राशिसहित ताम्रपत्र प्रदान गरिने छ। साथै, सबैभन्दा कान्छी प्रतिभा तीन वर्षीया मानशी भण्डारीलाई नइ चिचिला पुरस्कारअन्तर्गत पाँच हजार रूपियाँको पुरस्कार राशि र ताम्रपत्र प्रदान गरिने छ।
नइ प्रकाशनका सदस्यसचिव नरेन्द्रराज प्रसाईका अनुसार यो निर्णय नइ प्रकाशनका कुलपति श्रीमती इन्दिरा प्रसाईको अध्यक्षतामा सम्पन्न बैठकमा गरिएको हो।
