न्युज डेस्क / एचकेनेपाल डट कम –
हङकङ, २० मार्च। हङकङ एयरलाइन्सको एक विमान बिहीबार दिउँसो सामान राख्ने र्याकमा आगो लागेपछि फुजोउमा आपतकालीन अवतरण गर्न बाध्य भएको छ। हाङ्जोउबाट हङकङतर्फ उड्दै गरेको उडान नम्बर HX115 मा यो घटना भएको हो।
HX115 उडान नम्बरको यो विमान दिउँसो १२:५६ बजे हाङ्जोउ शियोशान विमानस्थलबाट हङकङतर्फ उडेको थियो र दिउँसो २:५६ बजे हङकङ पुग्ने तालिका थियो।
आगलागीको घटनामा कुनै मानवीय क्षति भएको छैन। पावरब्याङ्क (चार्जिङ डिभाइस)मा आगो लागेको आशंका गरिएको छ।
सामाजिक सञ्जालमा साझा गरिएका भिडियोहरूमा क्याबिन क्रु र यात्रुहरूले ओभरहेड कम्पार्टमेन्टमा रहेको एक झोलामा पानीका बोतलहरू खन्याइरहेको देखिन्छ, जहाँबाट धुवाँ निस्किरहेको थियो।
सामान राख्ने र्याकमा आगो लागेपछि क्याबिन क्रु र यात्रुहरूले आगो निभाए पनि पुन: सल्कन नदिन पानी र पेय पदार्थ खन्याइरहेका थिए। आगलागीका कारण र्याक पूर्णरूपमा कालो भएको छ।
एक यात्रुकी आमाले बताए अनुसार, र्याकबाट प्लेटको आकारको आगोको ज्वाला निस्केको देखिएको थियो। सुरुमा सबैजना स्तब्ध भए र दुईवटा सानो आगो निभाउने यन्त्र तत्कालै सकियो। सौभाग्यवश एक यात्रुले अन्य यात्रुहरूले दिएको बोतलको पानीले आगो नियन्त्रणमा लिन सफल भए। प्लास्टिक जलेको गन्ध क्याबिन भरि फैलिएको थियो।
