काठमाडौं – सामाजिक सञ्जालमा चर्चित गायिका एलिना चौहानलाई लक्षित गरी अभद्र टिप्पणी गर्ने एक युवकलाई प्रहरीले पक्राउ गरेको छ। प्रहरीको साइबर ब्यूरोले चितवन निवासी गुञ्जन राईलाई ललितपुरबाट नियन्त्रणमा लिएको जनाएको छ।
सामाजिक सञ्जालमा बढ्दै गएको दुर्व्यवहारको यो घटनाले नेपाली कलाकारहरूले भोग्नुपरेको अनलाइन हिंसालाई उजागर गरेको छ। चौहानले स्वयं साइबर ब्यूरोमा पुगेर राईविरुद्ध किटानी जाहेरी दिएपछि प्रहरीले कारबाही अगाडि बढाएको हो।
यो पक्राउ एक्लो घटना होइन, गायिका चौहानले अन्य तीन जनाविरुद्ध समेत किटानी जाहेरी दिएकी छिन्। उनले हालै गृहमन्त्री रमेश लेखकसँग भेटेर आफूमात्रै नभएर अन्य महिलाहरूमाथि समेत सामाजिक सञ्जालमा हुने गरेका अभद्र प्रतिक्रिया जनाउनेहरूलाई कानूनी दायरमा ल्याउन आग्रह गरेकी थिइन्।
