अपडेटः टाईफून नम्बर ८ को कारण हङकङमा १०० उडान रद्द, २,००० यात्रु प्रभावित
न्युज डेस्क / एचकेनेपाल डट कम –
हङकङ, ८ सेप्टेम्बर। हङकङ विमानस्थलको वेबसाइटका अनुसार सोमबार हङकङबाट प्रस्थान गर्ने कम्तीमा ५३ उडान र आगमन गर्ने ४७ उडान रद्द गरिएको छ।
विमानस्थल प्राधिकरणले कुल १०० उडान रद्द भएको पुष्टि गरेको छ, जसले करिब २,००० यात्रुलाई प्रभावित गरेको छ। साथै, लगभग ८०० उडान ढिलाइ हुने अनुमान गरिएको छ।
एचके एक्सप्रेसले यसअघि १० उडान रद्द गर्ने घोषणा गरेको थियो भने ग्रेटर बे एयरलाइन्सले दुई उडान रद्द गरेको छ। हङकङ एयरलाइन्सले नानजिङबाट आउने र जाने दुई उडानहरू – HX216 र HX217 – रद्द गरेको छ।
क्याथे प्यासिफिकले सोमबारका केही उडानहरू रद्द भएको र प्रभावित ग्राहकहरूलाई पहिल्यै सूचित गरिएको जनाएको छ।
यसैबीच, हङकङको मौसम विभागले आज दिउँसो १:१० बजे स्ट्रङ्ग विन्ड सिग्नल नम्बर ३ जारी गरेको छ। यसअघि विभागले आइतबार राति ९:२० बजे टाइफून नम्बर ८ को चेतावनी जारी गरेको थियो।
आँधीले १९ रुख ढाल्यो, दुई पुरुष घाइते
हङकङ, ८ सेप्टेम्बर। बिहान ८ बजेसम्म, प्राधिकरणले १९ वटा रुख ढलेको रिपोर्ट प्राप्त गरेको छ। हालसम्म पहिरो वा बाढीको कुनै घटना दर्ता भएको छैन।
सोही अवधिमा, अस्पताल प्राधिकरणका अनुसार दुई जना पुरुषले सार्वजनिक आपतकालीन कक्षमा उपचार गराएका छन्।
बिहान ८:२० बजेसम्म, विभिन्न जिल्लाहरूमा रहेका २९ वटा अस्थायी आश्रयस्थलमा जम्मा २१३ जनाले शरण लिएका छन्।
अपडेटः हङकङ मौसम विभागद्वारा टाईफून नम्बर ८ को चेतावनी जारी..
हङकङ, ७ सेप्टेम्बर। हङकङको मौसम विभागले आज राति ९:२० बजे ८ नम्बरको दक्षिणपूर्वी आँधी अर्थात टाईफून संकेत जारी गरेको छ। यो संकेतले ६३ किलोमिटर प्रति घण्टा वा त्यसभन्दा माथिको औसत गतिको हावा चल्ने अपेक्षा गरिएको जनाउँछ।
मौसम विभागले सबैलाई तत्काल आवश्यक सावधानी अपनाउन आग्रह गरेको छ। समुद्री किनारबाट टाढा रहन र जलक्रीडा (वाटर स्पोर्ट्स) मा संलग्न नहुन स्थानीय बासिन्दा र पर्यटकहरूलाई चेतावनी दिइएको छ।
यो संकेतले हङकङमा सम्भावित जोखिमलाई संकेत गर्छ, त्यसैले सबैलाई सुरक्षित स्थानमा रहन र मौसम सम्बन्धी अद्यावधिक जानकारीहरूको पालना गर्न अनुरोध गरिएको छ।
भोलि सबै विद्यालयहरू बन्द हुने..!
हङकङ, ७ सेप्टेम्बर। हङकङको मौसम विभागका अनुसार टाईफून सोमवार बिहान सूर्योदयको समयमा हङकङको दक्षिण-पश्चिममा २०० किलोमिटर भित्र पुग्ने अनुमान गरिएको छ, त्यसपछि पश्चिमी गुआङडोङमा भूमिमा प्रवेश गर्नेछ। ८ नम्बरको संकेत कम्तिमा सोमवार बिहान ११ बजेसम्म जारी रहनेछ।
शिक्षा ब्यूरोले सोमवारका लागि सबै दिवा विद्यालयहरू – माध्यमिक विद्यालय, प्राथमिक विद्यालय, विशेष विद्यालय, किन्डरगार्टन र किन्डरगार्टन-सह-बाल हेरचाह केन्द्रहरू – का कक्षाहरू स्थगित गरिएको घोषणा गरेको छ। साँझका विद्यालयहरूको व्यवस्था सोमवार घोषणा गरिनेछ।
उडानहरू रद्द
क्याथे प्यासिफिकले यात्रीहरूलाई विमानस्थलतर्फ जानुअघि आफ्नो उडानको स्थिति जाँच गर्न आग्रह गरेको छ, किनकि सोमवार सञ्चालन गर्ने तालिका अनुसारका केही उडानहरू रद्द गरिएका छन्। अन्य कैयौं एयरलाइन्सहरूले पनि उडानहरू रद्द गरेको घोषणा गरेका छन्।
फेरी सेवा सञ्चालक टर्बोजेटले टाईफूनका कारण शेउङ वान, काउलुन र झुहाई आउने-जाने बाँकी आइतबारका सेवाहरू रोकेको छ।
– पशन तमू । हङकङ
