नातिबाबु भट्ट / एचकेनेपाल डट कम-
कोलोराडो, अमेरिका। नेपालमा शान्तिपूर्ण आन्दोलनका क्रममा ज्यान गुमाएका जेनजी युवाको सम्झनामा कोलोराडोमा दीप प्रज्वलन तथा शोकसभा सम्पन्न भएको छ।
एनआरएनए कोलोराडो च्याप्टरको आयोजना तथा स्थानीय संघसंस्था र नेपालीभाषी समुदायका जेनजी पुस्ताका युवायुवतीहरूको उल्लेखनीय सहभागितामा दीप प्रज्वलन तथा शोकसभा सम्पन्न भएको हो।
नेपाली सांस्कृतिक केन्द्र नेपाली घरको प्राङ्गणमा आयोजित कार्यक्रम साँझ ७:३० बजेपछि सुरु भएको थियो। कार्यक्रमको सुरुमा दिवंगत युवाहरूको सम्झनामा एक मिनेट मौनधारण गरी अगाडि बढाइएको कार्यक्रममा एनआरएनए कोलोराडो च्याप्टरका पदाधिकारी, एनआरएनए एनसीसीका पदाधिकारी, स्थानीय संघसंस्थाका पदाधिकारी र जेनजीहरूले शोक मन्तव्य राखेका थिए। उनीहरूले निर्दोष युवाहरूको बलिदानलाई सम्मान गर्दै आत्माको चिरशान्तिका लागि दीप प्रज्वलन तथा शोकसभा कार्यक्रम आयोजना गरिएको बताएका थिए।
विशेषगरी जेनजीहरूले यस बलिदानले भ्रष्टाचार र दमनविरुद्ध नेपाली युवाको संघर्षलाई अझ सशक्त बनाएको र हजुरबुबा पुस्ताका भ्रष्टाचारीहरूबाट देशले मुक्ति खोजेको बताएका थिए।
अमेरिकामा यस्तै किसिमका कार्यक्रम कोलोराडोको नेपाली सांस्कृतिक केन्द्र भवन वेस्टमिन्स्टर, कोलोराडो स्प्रिङ्समा मात्र होइन, अमेरिकाका धेरैजसो राज्यका विभिन्न शहरमा नेपाली समुदायले आयोजना गरिरहेका छन्।
