धरान, २८ भदौ २०८२ – धरानस्थित भाटभटेनी सुपरमार्केटमा जेनजी आन्दोलनका क्रममा भएको आगजनीमा चार जनाको शव फेला परेको छ। शुक्रबार दिउँसो दोस्रो तलामा एक र तेस्रो तलामा तीन जनाको जलेको अवस्थामा शव भेटिएको प्रहरीले जनाएको छ।
इलाका प्रहरी कार्यालय धरानका डिएसपी प्रकाश जवेगुका अनुसार शवको पहिचान अझै खुल्न सकेको छैन। प्रारम्भिक अनुसन्धानले शवहरू लुटपाट गर्न भित्र गएका व्यक्तिहरूको हुनसक्ने आशंका गरिएको छ। मंगलबार राति तोडफोड र लुटपाटका क्रममा केही व्यक्ति भित्र फसेको हल्ला फैलिएको थियो। प्रहरीले मृतकको पहिचानका लागि अनुसन्धान जारी राखेको छ।
