न्युज डेस्क / एचकेनेपाल डट कम –
हङकङ, ११ जनवरी। युन लोङको योहो टाउनमा आज बिहान भएको भीषण आगलागीमा एक जना पुरुषको ज्यान गएको छ भने उनकी श्रीमतीको अवस्था निकै गम्भीर रहेको छ।
बिहान प्रहरी र फायर सर्भिसलाई धेरै उजुरी आएपछि घटना थाहा भएको थियो। योहो टाउनको ७ नम्बर ब्लकको मध्य तलाको एक फ्ल्याटमा आगो सल्किएको थियो। फायरफाइटरहरू घटनास्थलमा ३ मिनेटमै पुगे र करिब २० मिनेटको प्रयासपछि आगोलाई पूर्ण रूपमा नियन्त्रणमा लिए।
भित्र गएर हेर्दा फायरफाइटरहरूले सुत्ने कोठामा एक जोडी बेहोस अवस्थामा फेला पारे। ५६ वर्षीय पुरुषलाई पोक ओई अस्पताल पुर्याइए पनि बचाउन नसकिएपछि मृत घोषणा गरियो।
उनकी ५४ वर्षीया श्रीमतीलाई पहिले टुन मुन अस्पतालमा भर्ना गरियो। तर अवस्था झन् बिग्रिएपछि पामेला युडे नेदरसोल इस्टर्न अस्पतालमा सारिएको छ। अहिले उनी कोमामा छन् र ज्यान जोखिममा रहेको चिकित्सकहरूले बताएका छन्।
आगलागीका कारण भवनका कुल ४३५ जना बासिन्दालाई तुरुन्तै सुरक्षित ठाउँमा निकालिएको थियो। प्रारम्भिक जाँचमा आगो बस्ने कोठाबाट सुरु भएको देखिएको छ। घरको कुनै विद्युतीय सामानमा शर्ट सर्किट भएर आगो लागेको हुन सक्ने अनुमान गरिएको छ।
फायर सर्भिसले भने भवनको सबै फायर सेफ्टी उपकरण ठीक छन् र वार्षिक प्रमाणपत्र पनि वैध रहेको जनाएको छ। तर आगलागीको अन्तिम कारण अझै पुष्टि भएको छैन। प्रहरीले यो घटनामा अपराधको सम्भावना पनि नकारेको छैन र अनुसन्धान जारी राखेको छ।
