भक्तपुर । भक्तपुर नगरपालिकाले विदेशी पर्यटकबाट प्रवेश शुल्क उठाउन थालेको ३२ वर्ष पूरा भएको छ । आर्थिक वर्ष २०५०/५१ देखि सुरु भएको शुल्क प्रणालीअन्तर्गत हालसम्म ५२ लाख ६५ हजार २६४ विदेशी पर्यटकले भक्तपुर भ्रमण गरेका छन्।
नगरपालिकाले सुरुमा गैरसार्क मुलुकका पर्यटकसँग मात्रै शुल्क उठाएको थियो । चीनसहित सार्क मुलुकका पर्यटकसँग भने २०५४ सालदेखि शुल्क लिन थालिएको हो।
हालसम्म ३४ लाख २८ हजार ४६ गैरसार्क र १८ लाख ३७ हजार २१८ चीनसहित सार्क मुलुकका पर्यटक भक्तपुर आएका छन्।
कोरोना महामारीका कारण आर्थिक वर्ष २०७७/७८ मा सबैभन्दा कम तीन हजार ११२ पर्यटकले मात्रै भक्तपुर भ्रमण गरेका थिए । ३२ वर्षको अवधिमा सबैभन्दा धेरै पर्यटक आव २०७०/७१ मा आएका थिए । उक्त वर्ष दुई लाख ९० हजार ८९१ विदेशी पर्यटकले भक्तपुर भ्रमण गरेका थिए।
पछिल्लो आव २०८२/८३ मा दुई लाख २१ हजार ९७६ विदेशी पर्यटक भक्तपुर आएका थिए । गत आवमा सबैभन्दा धेरै भारतीय पर्यटक आएका थिए। ७० हजार ७११ भारतीय र ३६ हजार ७८३ चिनियाँ पर्यटकले भक्तपुर भ्रमण गरेका थिए।
नगरपालिकाले हाल गैरसार्क मुलुकका पर्यटकसँग प्रतिव्यक्ति दुई हजार र चीनसहित सार्क मुलुकका पर्यटकसँग ५०० रुपैयाँ प्रवेश शुल्क लिँदै आएको छ । नगर प्रवेशका १४ स्थानमा शुल्क सङ्कलन केन्द्र सञ्चालनमा छन्।
पर्यटक शुल्क नगरपालिकाको प्रमुख आन्तरिक स्रोतका रूपमा रहेको छ । नगरपालिकाका अनुसार शुल्कबाट सम्पदा संरक्षण, सरसफाइ, शिक्षा, स्वास्थ्य तथा पर्यटक लक्षित पूर्वाधारमा खर्च हुँदै आएको छ।
नगरपालिकाले पर्यटकका लागि छ भाषामा पर्यटन ब्रोसर, सूचना केन्द्र, निःशुल्क इन्टरनेट, ह्विलचेयर, लगेज राख्ने तथा मोबाइल चार्ज गर्ने सुविधासमेत उपलब्ध गराउँदै आएको छ । विदेशी पर्यटकको तुलनामा आन्तरिक पर्यटक करिब पाँच गुणा बढी भक्तपुर आउने अनुमान नगरपालिकाको छ। रासस
