पशन तमू / एचकेनेपाल डट कम –
हङकङ, ७ सेप्टेम्बर। नेपालमा आएको विनाशकारी बाढीका पीडितहरूको सम्झनामा हङकङको याउ मा तेई स्थित हेनरी जी. लियोङ कम्युनिटी हलमा एक विशेष श्रद्धाञ्जली कार्यक्रम सम्पन्न भएको छ।
सोमबार साँझ आयोजित उक्त कार्यक्रममा विभिन्न व्यक्तिहरू, नागरिक समाजका प्रतिनिधि र सर्वसाधारणको उपस्थिति रहेको थियो।
साँझ ६:३० बजेदेखि सुरु भएको कार्यक्रममा आमन्त्रित पाहुना तथा सर्वसाधारणले दर्ता प्रक्रिया पूरा गरी शोक पुस्तिकामा आफ्ना समवेदना सन्देशहरू दर्ता गराएका थिए।
७:३० बजे औपचारिक रूपमा सुरु भएको कार्यक्रममा प्राकृतिक विपत्तिमा ज्यान गुमाएकाहरूप्रति १ मिनेटको मौन धारण गरिएको थियो। त्यसपछि, उपस्थित सम्पूर्णले हलमा उपलब्ध गराइएको फूल अर्पण गर्नुका साथै एलईडी मैनबत्ती प्रज्वलन गरेर श्रद्धाञ्जली व्यक्त गरेका थिए।
औपचारिक कार्यक्रममा नेपालका का.व. महावाणिज्यदूत सतीश गुरुङले मन्तव्य राख्दै बाढी पीडितहरूको दुःखमा ऐक्यबद्धता जनाए। त्यसैगरी, लेजिस्लेटिभ काउन्सिलकी अध्यक्ष एवं नेशनल पिपुल्स कंग्रेसको स्थायी समितिकी सदस्य स्टारी ली वाई-किङ र याउ त्सिम मोङ जिल्ला परिषद् सदस्य अरुणा गुरुङले पनि कार्यक्रममा शोक मन्तव्य व्यक्त गर्दै सहानुभूति प्रकट गरे।
साँझ ८:१० बजे औपचारिक सत्र समापन भए तापनि हलमा शोक पुस्तिका र फूल अर्पण कार्यक्रमहरू साँझभरि नै सबैका लागि खुला राखिएको थियो।
फोटोः जगतअम्बु गुरुङ
