काठमाडाैं, पाल्पाको दोभानस्थित सिद्धबाबाबामा बस दुर्घटनामा परेको छ। प्रहरीका अनुसार पाल्पाबाट बुटवल जाँदै गरेको लु १ ख ५७७१ नम्बरको बस सडकबाट तिनाउ खोलामा खसेको हो। दुर्घटनामा परेकामध्ये ४ जनाको शव निकालिएको छ। दुईवटा शव दुर्घटनास्थलमा फेला परेको र दुईवटा तिनाउ नदीमा बग्दै गरेको अवस्थामा बुटवलमा फेला परेको प्रहरीले जनाएको छ।
बसमा कति यात्रु थिए भन्ने खुल्न सकेको छैन। बस खोलामा खसेका कारण ठूलै हताहत भएको अनुमान गरिएको छ। घटनास्थलमा सुरक्षाकर्मी परिचालन गरिएको छ। प्रहरीसहित शसस्त्र र नेपाली सेनाको टोली पुगे पनि बस खसेको ठाउँमा माथिबाट पहिरो खस्ने क्रम जारी रहेका तथा भौगोलिक विकटताका कारणले उद्धारमा कठिनाई भएको प्रहरीले जनाएको छ।
बस धनीका अनुसार २०/२५ जना यात्रु बसमा सवार थिए। मृतकहरुको सनाखत हुन सकेको छैन। अन्य यात्रुहरु पनि खोलामा डुबेको हुनसक्ने अनुमान गरिएको छ।
