हङकङले नान्जिङ नरसंहारका पीडितहरूलाई श्रद्धाञ्जली अर्पण गर्‍यो

न्युज डेस्क / एचकेनेपाल डट कम –
हङकङ, १३ डिसेम्बर। हङकङका कार्यवाहक मुख्य कार्यकारी एरिक च्यानले शुक्रवार सन् १९३७ र १९३८ को बीचमा भएको नान्जिङ नरसंहारका ३ लाख भन्दा बढी पीडितहरूलाई श्रद्धाञ्जली अर्पण गरेका छन्।

एडमिरल्टीस्थित केन्द्रीय सरकारी कार्यालयमा आयोजित समारोहमा च्यानले अन्य वरिष्ठ सरकारी अधिकारीहरू, विधायी र कार्यकारी परिषदका सदस्यहरूसँग मिलेर श्रद्धाञ्जली अर्पण गरेका हुन्।

राष्ट्रिय गान बजाइएपछि दुई मिनेट मौन धारण गरिएको समारोहमा च्यानले पीडितहरूका लागि पुष्पगुच्छा चढाएर स्मृति पुस्तिकामा हस्ताक्षर गरेका थिए। यो वर्ष नान्जिङ नरसंहारको ११औं राष्ट्रिय स्मृति दिवस हो।

समारोहमा केन्द्रीय जनसरकारी कार्यालयका प्रतिनिधिहरू, चिनियाँ जनराजनीतिक परामर्श सम्मेलनको राष्ट्रिय समितिका उपाध्यक्ष सीवाई लियुङ र पूर्व मुख्य कार्यकारी डोनाल्ड साङलगायत सहभागी भएका थिए।

नान्जिङ नरसंहारमा के भएको थियो?
नान्जिङ नरसंहार (Nanjing Massacre) सन् १९३७-३८ मा जापानी सेनाले चीनको नान्जिङ शहरमा गरेको एक भयानक नरसंहार हो। यस घटनामा जापानी सेनाले तत्कालीन चीनको राजधानी नान्जिङमा ३ लाख भन्दा बढी नागरिक र युद्धबन्दीहरूको हत्या गरेका थिए।

यो नरसंहारमा जापानी सैनिकहरूले निर्दयी तरिकाले सर्वसाधारण नागरिक, महिला, बालबालिका र वृद्धवृद्धाको हत्या गरेका थिए। साथै व्यापक रूपमा लुटपाट, बलात्कार र अन्य युद्ध अपराधहरू पनि गरिएको थियो।

यो घटना द्वितीय चीन-जापान युद्धको एक काला पृष्ठको रूपमा चिनिन्छ र यसलाई विश्वकै सबैभन्दा क्रूर युद्ध अपराधहरू मध्ये एक मानिन्छ। चीन सरकारले हरेक वर्ष डिसेम्बर १३ तारिखलाई राष्ट्रिय स्मृति दिवसको रूपमा मनाउँदै आएको छ।