काठमाडौँ, २०८१ माघ १३ गते— नइ प्रकाशनले विभिन्न क्षेत्रमा उल्लेखनीय योगदान पुर्याएका पाँच विशिष्ट व्यक्तित्वलाई सम्मान गर्ने घोषणा गरेको छ। यो वर्षको पुरस्कार वितरणमा साहित्य, समाज सेवा र सौन्दर्य क्षेत्रका अग्रणी व्यक्तित्वहरू सम्मानित हुने भएका छन्।
साहित्यको क्षेत्रमा लामो समयदेखि योगदान पुर्याउँदै आएका पाल्पाका कृष्णप्रसाद वस्याललाई साठी हजार रुपैयाँ राशिको ‘नइ देरुनीख प्रदीप्ति पुरस्कार’ प्रदान गरिने भएको छ। उनले कविता, निबन्ध र अनुवादको माध्यमबाट नेपाली साहित्यको विकासमा महत्वपूर्ण भूमिका निर्वाह गरेका छन्।
साहित्यकार ठाकुर शर्मा भण्डारीलाई उनको कृति ‘नइ कीर्ति विवेचना’ का लागि ‘नइ कपिल शोध पुरस्कार’ प्रदान गरिने भएको छ। त्यसैगरी, झापाका धनकुटे कान्छालाई शिक्षा र साहित्य क्षेत्रमा पुर्याएको योगदानको कदर गर्दै ‘नइ देरुनीख गौरव पुरस्कार’ दिइने भएको छ।
विशेष गरी यस वर्षको पुरस्कार वितरणमा यौनिक तथा लैङ्गिक अल्पसंख्यक समुदायको प्रतिनिधित्व गर्दै पोखराकी तेस्रो लिङ्गी रजनी थकालीलाई ‘नइ रामलक्ष्मी पुरस्कार’ प्रदान गरिने निर्णय गरिएको छ। उनले राष्ट्रिय तथा अन्तर्राष्ट्रिय स्तरमा यौनिक तथा लैङ्गिक अल्पसंख्यक समुदायको हक अधिकारको लागि गरेको काम उल्लेखनीय छ।
अन्तर्राष्ट्रिय स्तरमा नेपालको नाम उच्च राख्न सफल भएकी झापाकी मनीषा राजवंशीलाई पच्चीस हजार रुपैयाँको ‘नइ देरुनीख पौरख पुरस्कार’ प्रदान गरिने भएको छ। उनले थाइल्यान्डमा आयोजित विश्वका ४४ राष्ट्रका आदिवासी किशोरीहरूको सौन्दर्य प्रतियोगितामा मिस हेरिटेज पेटाइट युनिभर्सको उपाधि जितेकी थिइन्।
नइ प्रकाशनकी कुलपति इन्दिरा प्रसाईको अध्यक्षतामा बसेको बैठकले यी सबै पुरस्कारहरूको घोषणा गरेको हो। यी तीनवटा प्रमुख पुरस्कारहरूको राशि पचास-पचास हजार रुपैयाँ रहेको सदस्यसचिव नरेन्द्रराज प्रसाईले जानकारी दिएका छन्।
