पशन तमू –
हङकङ, ३१ जनवरी। हङकङमा सर्प वर्षको स्वागत गर्दै चिनियाँ नयाँ वर्ष मनाईएको छ। बिहीबार राति भिक्टोरिया हार्बरमा आयोजित सन् २०२५ को चिनियाँ नयाँ वर्षको आतिशबाजी प्रदर्शनले स्थानीय र पर्यटक दुवैलाई मन्त्रमुग्ध पार्यो।
राति ८ बजेबाट सुरु भएको २३ मिनेट लामो यो प्रदर्शनमा तीन वटा बार्जहरूबाट २३,८८८ पटाकाहरू प्रयोग गरिएको थियो। कार्यक्रमको सुरुवात “नयाँ सुरुवात” दृश्यबाट भएको थियो, जसमा भाग्यशाली अंक आठ र सुनको सिक्काको आकारका आतिशबाजीहरू प्रदर्शन गरिएको थियो। त्यसपछि “फुल्दै गएको समृद्धि” दृश्य प्रस्तुत गरिएको थियो।
हङकङ पर्यटन बोर्डद्वारा बुधवार राति क्याथे अन्तर्राष्ट्रिय चिनियाँ नयाँ वर्ष परेड धुमधामले सम्पन्न भएकोछ। चिम सा सुईमा सम्पन्न कार्यक्रममा स्थानीय र पर्यटक दुवैको उल्लेखनीय सहभागिता रहेको थियो।
परेडमा ९ वटा भव्य फ्लोट र ५५ स्थानीयसहित चीन र अन्तर्राष्ट्रिय प्रदर्शन समूहहरूका २८ प्रस्तुतिहरू समावेश थिए। परेडमा कोरियाली गर्ल ग्रुप केप१एर र थाई ब्वाई ब्यान्ड LYKN को प्रस्तुतीसमेत समावेश थिए।
कार्यक्रमको दौरान धेरै स्थानीय र पर्यटकहरूले आफ्ना फोन र क्यामेराहरूमा यी भव्य समारोहका दृश्यहरू कैद गरेका थिए। केही दर्शकहरू राम्रो दृश्य स्थल सुरक्षित गर्न क्यान्टन रोडमा दिउँसो ३ बजेदेखि नै लाइनमा बसेका थिए।
मुख्य कार्यकारी जोन लीले आफ्नो भाषणमा भने- ‘चिनियाँ नयाँ वर्षको स्वागत गर्न हङकङ भन्दा राम्रो ठाउँ अरु कतै छैन।’
यस वर्षको परेड “सौभाग्यको वर्षको उद्घाटन” विषयवस्तुमा आधारित थियो। जसमा ५५ प्रदर्शन समूह र फ्लोटहरूले १४ देश र क्षेत्रहरूसँगै हङकङको विशेष प्रदर्शन थियो।
परेड हङकङ सांस्कृतिक केन्द्र पियाजामा राति ८ बजे सुरु भएर क्यान्टन रोड, हाइफोङ रोड र नाथन रोड हुँदै शेराटन हङकङ होटल एण्ड टावर्समा सम्पन्न भएको थियो।
चिनियाँ नयाँ वर्षको तेस्रो दिनको विशेष कार्यक्रमको रुपमा शा टिनमा घोडदौड समावेश छन्।
पशन तमू / एचकेनेपाल डट कम
